Related Articles
Kawlram Nih Rampi Ralkap Hi Kan Ngei Bal Maw? A Um Bal Maw A Reng Reng Ah. Ralkap timi cu: Mipi nunnak le Rampi khumzual awk hi an rian ngan bik asi. Mipi nih Duhdim tein le Hnangam tein khua kan sak khawh nak hnga Ralkap nih ṭuanvo a lak lai. Ramchung Ramleng kan ral vialte chung in ral an kan ven piak lai. Mipi Thahnawn cu chimh hlah, an kut par hmanh in mipi tongh a ngah lo. Tu cu biktaling in thil a kal dih cang. Upa le ngakchiat thlu lo, Tar le ngakchia bawhte tiang in an luat lo. Mikip tlaih, hrem, that, thongthlak, Innlo meiduah piak, Mipi thilri le hlawnthil vialte fir, tbk vialte hi Damiah rian asi. Gangstar rian asi.
Vawlei cung misual bik hmanh nih an tuah ballo i tuah an ngamh lomi tuksapur ṭihnung thil vialte, cu Kawl ralkap aa ti mi hna nih an tuah dih. Mipi an kan ral I ral thawh hnawh mi ralkap cu vawlei tuanbia ah a um bal lo i hi hnu zong ah aum te lai lo. Anawratha Operation ee, Shinphiosin Operation ee, zemlo operation ee tiah min phun phun pek in, hmuh mi thah, fir, chut, Tlaihhrem, thongthlak, thah dih nawn dih, meiduah dih, tbk in an hmai ka a um mi poah that dih mi Policy in a kal mi MAH te cu Ralkap kan ti hna lai. Kan ti khawh Naisai hna lo.
Zohhmanh! Kawl Ralkap aa ti mi MAH te kut in; Sualnak ngei lo Mipi 2070 an thah hna: Hramhram in tlaih in hrem mi 15000 deng: Thongthlak mi 12000 deng: 1200 leng an luat rih lo: Kum tlinlo 2 telin 74 cu thihdan: Hri awh in thah ding mi 41: Thihdan pek mi vialte 120 leng an si: Innlo meidauh mi 20000 deng: Innchut mi 700 deng: Ralzam 1000000 leng: Karenni ram Milurel nuai 3 ah nuai 2 ralzam an si: Cazin hngalh khawh lomi an tam pi rih. Cazin felfai tein I lak khawh sehlaw, hi nak in let 2 in a tam deuh lai. Rallokap sual zia le ralhrang an si ning hi kawlte nih an hngalhnak hi kum 2 lawng asi rih.
Tlangcung miphun cung ah cihmih in, ralhrang an si nak hi kum 70 leng Kum 80 deng asi cang. Panglong adih in, Uk Sang a thih ri in, nihin tiang Kawl Ralkap aa timi hna an tuahto ning le ziaza hi Rampi ralkap ziaza le muisam pelte hmanh a ken ballo mi an si. Geneva Convention le UN law zong an buar dih. Kawl ram upadi vialte an buar dih: anmah nih mihrut zemlo tlaih in an ti tlaih mi 2008 phunghrampi zong an buar dih. Vawleipi ah an buar lomi upadi aum ti lo: Hri awk in thah ding lawng an si ti lo, an thlarau hmanh thongthlak in thah chih ding mi Rallokap an si. Pu Ngun San Aung le Dr. Andrew NCL te hi khua tuak cang uh.
2008 Phunghrampi aa tlaih mi an si ko ahcun: Kan Pi Suu le Tamada Win Myint cu Tazacuainak nawl aum lo. Rampi Luban hna cu an hnukhirh in tazacuai angah lai lo ti pei asi cu. Democracy adik mi in kan in kalpi hna an ti. Democracy sawh2 hmanh ah; sualnak kawl in mipi tazacuai angah lo. Kan Pi Suu zong hi Mipi lak ah Mipi asi ve. Democracy dik an ti ko ahcun: Ruel Of Law aum lai. Upadi cung ah ahohmanh an um awk asi lo. Thiamlo coter in Kan Pi Suu tazacuai cu Vawleipi hngalh asi. Nipidaw ah a chiah chel, Rangoon a Inn ah an chiah chel, Upadi an buar dih ko. Mipi cu kanmah cu kan thih zong ah a poi loh tiah lung kan I sak khawh nain, Kan Pi Suu luat lo ding cu kan ruat khawh hrim lo. Kan Pi Suu cu thlah siseh law, a mah he kawlram dindaihnak caah bi ai ruah uh ti cu Mipi tam deuh kan saduhthah asi. Cu cu hngak buin, a nung ṭhan khawh tilo ding mi mipi kong ruah ah hnakruh no a ṭamh ko.
Paucan Dohthlen tu phu zong nih tawn biaruahnak caah Innka kaupi in awn zungzal a herh ve. Bia kan I ruah tik belte ah: Hramhram in thah mi Mipi le kan ralkap hna caah Transitional Justice aa tel lo ahcun a ngah ve lo asi ko. Nawl buar mi vialte dantat nak kong zong ceihhmai asi ve lai. Tawnbiaruahnak le meeting poah cu mipi nih kan cohlan awk asi lo. Meeting aruang na hngalh ah siseh, nan hngalh lo ah siseh, Ralhrang he ṭhutum ṭi, Umkal ṭi, biaruah ṭi, tbk hrim tuah awk kan si lailo. Nain, saram bang I Thatnawn mi mipi hna caah ceihhmai nak aum lai, an duh lo ahcun: Sualnak ngeihlo an thah mi mipi caah Rallokap cu an cihmih tiang in kan doh hna aherh ve. Pathian bia le Pacang I cuh in/ i lungsak in/ I hnemh awk cu asi ti lailo.
Ralhrang cu Tutan ah an cihmih asi lo ahcun: a hnu ah a kir ṭhan lai. Kan Pi Suu cu Kawlram Ramkhel ah tel ve lo an duh bangin, Amah MAH le Rallokap zong Ramkhel ah I tel khawh ti lo ding tuah an herh / an cihmih a herh. Ralhrang he meeting tuah buin na tuak ding mi cu: a can rem tik ah ka seh te lai, an tefa sa zong ka ei pet te lai tiah khua a ruat colh ti kha. Mikei le Sahrang cu an mei an thuh, an hau an zuk, mi seh an duh tik can poah an chuah ve. Cakei, Mikei, Ceihngia, Ram Ui he biaruah rai asi lai lo. Na caah ṭhatnak an tuah mi nak in thihnak lam a tam deuh ti kha hngalh zungzal ding asi. A chuak ka in nihin tiang a sin ah dinfel nak aum ballo mi, mi a hlen zungzal mi Ralhrang Rallokap cu maw cu tluk cun na zumh I naa bochan: CDF tu cu kei in lamh chih na duh fawn.
Cucaah Kawlram ah Rampi Ralkap kan I ngeih ballo kan tinak cu asi. Khuaruah har tiang in a thluak chiat mi: a hakkau bak mi hriamtlai phu le an hnu zulh hna lawng an um. Damiah le Satan nak in a sual deuh mi Hriamtlai ralhrang lawng an um. An hnu zulh hna cu: Rit hai sii phun le bing a zuk I a ri zungzal mi: Minung lungthin an thlau I saram lungthin a ken mi lawngte ansi ve. Cu bantuk phu le bu cu Hriam an i tlai zong ah Kawlram Ralkap ah kan cohlan khawh hna lo. Kawlram Ralkap cu kan hmuh sak kun nan ti ahcun: CDF / PDF/LDF / CNDF le CNF tiah kan ti ko hna lai. Aruang cu Mipi he Ralhrang cihmih awk ah Ral kan doh ṭi caah asi. Mipi he ṭhen khawh asi lomi Ralkapbu an si ve. Mipi lo in ahohmanh nih kan uk ti hna hlahseh, mipi duh ning in 100% uk sicang seh timi uk phung kan phak hlan lo tiang Mipi he Raldoh ding mi Mipi Ralkapbu kan si ve.
Kan Pi Suu a luat ah siseh, a luat lo ah siseh; Kan Pi Suu he bia an I ruah ah siseh, an I ruah lo ah siseh; abiapi asi lo. Dohthlennak kan tei ding tu kha a poimawh mi le abiapit mi asi. Dindeih nak lam aa tlaih mi Kan Pi Suu sin ah hriamtlai in Dohthlennak nih hmunhma angeih lo. Hriamtlai in doh uh ati ballo ding kha hngalh cia asi. Achim awk ding bia cu Mipi duhning in si ko seh, ati lai. Cucaah, CDF PDF cu Kawlram Rampi Ralkap kan si ti kha 100% hngalh can kan cu cang.
Dohthlennak TEI awk ah Phaisa, Hriamnam, Hriamnam serthiam nak le Raldoh thiam nak Fimnak kan bau bik ko. NUG zong nih Ramdang kutke lawng I bochan ti hlah uh, thli lawng in Raldoh ti loin, ahmun ah ra uh law, Raldohnak hi kan hruai cang rawh uh. Ral Tei awk ah hmunhma hip le uk khawh hi abiapi bik mi asi. Chinram Thantlang cu Rallokap nih uk in hip dih awk ah Khua Nupa he an I tawn cang. Nannih Ramdang lawng ah nan um zungzal awk asi tilo. Dohthlennak aphi hi Kan Pi Suu asi lo, PEACE tuah zong asi lo, Rallokap he biaruah nak zong asilo. ASEAN zong asi lo. American duh mi Democracy lei ah kir ṭhan ti mi le Nurhin covo aum bak lai ti mi zong asi lo. Dohthlennak A phi ngai ngai cu RAL TEI lawng lawng hi asi. TEINAK hmuh le Ralhrang MAH te thluk dah ti lo ah: Kan caah Dohthlennak aphi dang aum khawh ti lo. Credit: Zingtincuai Cinzah
