Related Articles
MINDAT AH KUM 112 MI RALZAAM NAK AH A NUNNAK LIAM: Mindat ah kum 112 mi upa pakhat cu ralzaamnak ah 27 Chiapa zaanlei ah a nunnak a liam tiah The Mindat Post nih a țial. A nunnak liammi hi Pu Ng’Lo Awm Ghung a si i, a nih hi Cho (Lai) miphun a si. Hlanlio nunphung, bia le hla a theihngal ngaimi zong a si. Pu Ng’Lo Awm Ghung cu Cho ( Lai) nunphung, lupawng, arthlakhen, nam hna aa thlaih pengmi a si, a nih hi Mindat pengah kum upabik a si lai tiah zumh a si.
A nih hi Mindat – Matupi lam pawng khua pakhat mi a si i, an khua cu ralhrang nih an khanghpiak hna hlei ah khua pawngkam ah bomb zong an hmanh taak tiah theih a si. A nih hi mirang chan le Japan chan a rak tong manhmi a si, Myanmar ram nawlngeihnak lak a si hnu ah a hmuhtonmi a chimmi cu “Mirang chan le Japan channak in a hraang deuhmi a si” tiah a chim ti’n naihniammi hna nih an chim. Mindat peng ah ralzaam mi eidin, sii-ai chambau ruangah kum upa le ngakchia an nunnak a liam pah lengmang.
Thawngdang Relchih: Central YLA Nih DHL Ah Gynaecoloy Doctor A Um Khawh Nakhnga Hmalak. Central Young Lai Association nih District Hospital Lawngtlai ah Gynaecologist a um khawh nakhnga hma an lak cuahmah, District Hospital Lawngtlai ah Gynaecologist chiah dingin cozah an hal i, hi an halnak hi 10 Hniang 2022 tiang an hngah lai nakkong cu cathanh an chuah.
Central YLA nih 25 – 28 Biangreithlep ahkhan District Hospital Lawngtlai ah riantuan i zat lo ruangah cozah sin halnak le Picketing an rak ngei, hi an cawlcanghnak nih hin 26 & 27 Biangreithlep ah District Hospital Lawngtlai ah Doctor Specialist Gynaecologist, Pediatrician le ENT hna chiah an si, Specialist zong nih an rian an tuan i, Gynaecoloy doctor nihcun a tu tiang a rian a pehzulh lo. Central YLA nih cun Lawngtlai DHL riantuan i zat lo ruang i Picketing an ngeih hnu, thlahnih liam hnu zongah kan herhbik mi Gynaecologist kan ngei lo, hi ruangah Lawngtlai District chungah harnak tampi ton a si i, fur nikhua chia le lam chia lakah lamhla in panh hau a um i, dam lo le harsa caah chawva chambaunak a um tawn.
CYLA nih Picketing an ngeih lio ah a dihdongh tiang hmalak dingin an chim bantukin Lawngtlai ah Gynaecoloy doctor a um khawh nakhnga hmalak cuahmah a si. CYLA nih cozah an halnak hlawh a tlinlo ahcun 11 Hniang thawkin a si khawhchung in lamdang in hmalak ding an chim, India Independent Day Programme zongah duhlonak langhter (boycott) an timh.
