Related Articles
Thantlang Ralhrial Ngakchia Khuai nih a Seh caah Nunnak Liam: Thantlang peng, Vanbai khua ah ralhrial dirhmun in khua a sami Pa Cung Khua Lian (kum 4) cu nihin chun ah khuaingal nih a seh caah a nunnak a liam, tiah Thantlang khua upa Pu Ram Khar nih a Facebook cahmai ah thawngthanhnak a ttial.
“Pa Cung Khua Lian (Kum 4) cu ralzam in an i dornak Vambai khua ah khuaingal nih nihin 7.8.2022 chun 12:00 ah a seh i, zanlei 7:00 pm hrawng ah a kan thih tak,” tiah a ttial. Pa Cung Khua Lian hi Pu Tuan Hmung fapa a si i, ahlan ah Thantlang khua, Saihpoizi sang ah a rak ummi an si.
“Khuaingal hi an umnak inn pawng ah a um. Pu Tuan Hmung hi Pu Hram Al fa a si . Thantlang TBC Khrihfa bu an si. Tantakmi chungkhar nan dihlak nan ngaihchiatnak kan in tuarpi hna. Pathian nih nan ngaihchiatnak in hnem ko hna seh,” tiah Pu Ram Khar nih ngaihchiatpinak a ttial. Credit: TCJ
Thawngdang Relchih: US Ah Laimi Pafa Hna Nam In A Sawhtu Cu Kum 25 Thongdan An Pek: Kum 2020, March thla lio ah Laimi pafa hna nam in a sawhtu Jose Gomez III (kum 21) cu US biaceihzung nih August 4, cawn nili ah dantatnak an pekmi a thanh. Pu Bawi Cung Nung le a fale pahnih cu US ram Texas ramkulh Midland khua, Sam’s Club dawr i an kal lio ah Spanish pa Jose Gomez nih nam in a rak sawhmi hna an si. Jose Gomez nih cun Covid zawtnak a chuahtertu Tuluk miphun ah ka ruah hna caah ka sawhmi hna a si, tiah biaceihzung ah a chim.
Hi caan hi Covid zawtnak a chuahka a si caah Asian mi le a bik in Tuluk miphun cu huat le ral an ton tuk lio a si. Cucaah Pu Bawi Cung le a fapa zong hi sualnak le palhnak zeihmanh an ngei lo nain namsawh tiang an tuarnak a si. Pu Bawi Cung Nung le a fapa nam in sawh an ton hi 2020, March 14, zanlei 7:32pm ah a si. Nam sawh an ton lecangka in an pawngkam ummi Mirang pa nih a zuanhnawh hna i amah zong hliam a tuar. An pafa in an hmai ah a sawh hna i a fapa Robert hi fak tuk in a hliamh. An pahnih in siizung ah an tlikpi colh hna. Ni zeimawzat siizung an um hnuah dam tein an chuak ṭhan.
A sawhtu Jose Gomez hi a sawh hna lio ah kum 19 a si, kumhnih a rauh hnuah biaceihzung nih kum 25 thongdan an pek hi a si. Pu Bawi Cung Nung hi Midland Chin Immanuel Baptist Church chungtel a si i, Kum 2014 ah US a phanmi an si. Pathian a duh ngaimi a si, tiah theih a si. Laitlang lei a khua cu Thantlang peng Thau khua a si nain Kalaymyo ah a ummi an si.
