Related Articles
CDF-Zotung Chungtel 3 Cu SAC Ralkap Nih Meikhangh In An Thah Hna! CDF-Zotung Commander in chief Thah Ceu telh in minung 3 cu SAC ralkap nih July 27 ah meikhangh in an rak thah hna, tiah CDF-Zongtung nih cathanh an chuah. SAC ralkap hna cu a luancia July 22 ah Chin ramkulh, Matupi peng Rangcci khuachung ah lut in, khuami 27 cu Biakinn chung ah an rak tlaih hna.
CDF-Zotung in chimphuannak nawlngeitu pakhat nih a chim ning ah cun, “CDF-Zotung commander in chief pakhat le ralkap 2 hna nih khuami tlaih a tongmi hna hrem an ton le ton lo a thli in an veh hna lio ah SAC ralkap nih July 23 ah an rak tlaih hna. Khuami nih cun tlaihkhih an ton zong an rak thei hna lo. July 27 SAC ralkap nih an ruak an khanghmi rim cu kan theih, an ruak cu aho an si theih fian a har ngai nain minung 3 an si caah, commander in chief le a ralkap an si ko lai tiin kan fehter” tiah a chim.
SAC ralkap kut in thah a tongmi hna cu CDF-Zotung commander in chief Thah Ceu kum 40 hrawng, CDF-Zotung Aung Ming Thang le Thang Cing Mang kum 20 hrawng an si. SAC ralkap nih an tlaihmi khuami 27 hna cu nihin August 3 ah an thlah ṭhan cang hna, tiah theih a si.
Thawngpang Dang Relchih: Russia Ramleng Palai Nih SAC Ralkap Tuahsernak Cu A Lungtlin Kong A Chim!: Ramchung buainak a daih khawh nakhnga SAC ralkap nih an tuahmi viatle cu kan lungtling, tiah Russia ramleng palai Sergei Lavrov nih SAC ralkap hruaitu hna he Naypyidaw i tonbiaruahnak an ngeihnak ah a chim, tiah Russia media hna nih an langhter.
SAC ralkap nih a luancia zarh ahkhan democracy dirhkamh in cawlcanghnak a tuahtu Ko Jimmy, Ko Phyu Zayar Thaw, Ko Hlah Myo Aung le Ko Aung Thurah thihdan pek an sinak cu letpiak/khirh ding in ASEAN le ramkip nih nawlnak an tuah cio nain an nunnak an lak hna ruangah, Myanmar daihnak ding lam an phih, tiah ramkip nih SAC cu sual an phawt. SAC ralkap nih uknak an lak February 1, 2021 hnu in atu tiang ah nu le ngakchia telh in tualchung mi 2000 leng an thah cang hna, tiah AAPP nih a langhter.
Sagaing Ramṭhen Ah Minung 10 Cu SAC Ralkap Nih An Thah Hna I, Inn 15 Hrawng An Khangh!: Sagaing ramṭhen Minmu(မြင်းမူ) peng Latpankyin(လက်ပန်ကျင်း) khua cu August 1 ahkhan SAC nih vanlei in an kah hna i, khuachung ah lut in tualchungmi 10 cu an tlaih hna i an thah hna, cupinah Inn 15 hrawng an khangh, tiah theih a si. Kahdohnak ah Helicopter an hman i, tanglei in rallam an sial caah tualchungmi zaamnak hngal lo in a um mi cheukhat hna cu SAC ralkap nih an tlaih hna i, khuami 10 zong cu an thah hna. Inn 15 hrawng an khangh pinah innzuat saṭil zong an thah hna, tiah tualchungmi pakhat nih a chim.
SAC ralkap nih an thah mi 10 hna cu an lu, an hngawng le an paw hna ah nam hma lawngte in an khat, tiah a chim chap. Cu lawng siloin tualchungmi 14 cu ralphaw ah an kalpi hna i, atu tiang an thlah rih hna lo caah an chungkhar hna cu lungrethei ngai in an um, tiah theih a si. Credit: The Chin Post
