Related Articles
Hakha Khuapi Sakremhnak Zung Ah Inn Pakhat A Kaang! Chin ramkulh khuapi Hakha khuachung, Vuamtu Maung pumpululh certual pawng sakremhnak(construction) zung chung ah inn pakhat a kaang, tiah theih a si.
Hakha ummi pakhat nih cun, “Nihin August 31 zinglei sml 2:00 hrawng ah sakremhnak zung chung ah inn pakhat a kaang. A kangh tlawmpal ah meithat motor an ra i, an phalh,” tiah The Chin Post ah a chim. Inn kaang hi khoika in dah mei aa thawk ti cu hngalh a si rih lo.
Chin Ramkulh, Matupi Peng Ah Zatlang Ukhruainak In Siangsangrun Dirh Timh A Si: Chin ramkulh, Matupi peng ah zatlang fimcawnnak siangsangrun cu tukum chung ah dirh khawh ding in timhtuahnak kan ngei, tiah Matupi Township Board of Education in ṭuanvo ngeitu nih a chim. “Basic Education High School cu a himnak hmun ah sianginn pathum dirh khawh ding in timhtuah a si,” tiah Matupi Township Board of Education in ṭuanvo ngeitu nih cun a chim.
Matupi peng khuate tam deuh ah zatlang ukhruainak phu nih siangniamrun le sianglairun cu an hon khawh cang nain, siangsangrun cu an hong kho a si rih lo. Hon chap an timhmi siangsangrun ah cun sianginn pakhat ah cachimtu (saya/sayamah) a tlawm bik minung 9, sianginn 3 ah cun cachimtu 27 an herh lai nain, atu tiang ah sayamah pakhat lawng kan ngei rih, tiah Township Education Board lei nih an chim. “Kan rianṭuannak ah phaisa lei harnak kan ngeih caah cachimtu thlahlawh zong kan pe kho rih lo. Mizapi timhtuahnak a si caah, mipi kan bochan ko hna,” tiah Township Board of Education in ṭuanvo ngeitu nih cun a chim. Tlamtling tein sianginn dirh a si khawh nakhnga cachimtu leng ah sianginn thilri zong kan herh rih, tiah a chimchap.
Matupi pengchung zatlang ukhruainak in dirhmi siangniamrun le sianglairun ah a kaimi sianghngakchia dihlak hi 7,000 hrawng an si, tiah ṭuanvo ngeitu nih an chim. Matupi ah CDM a tuahtu cachimtu tampi an um ko nain, harnak tampi ruang ah zatlang hruainak in dirhmi sianginn ah aa tel kho lo mi tampi an um i, cu hna zong cu zatlang ukhruainak tang ah i tel cio ding in sawmnak an tuah. Credit: The Chin Post
