Related Articles
Daw Aung San Suu Kyi cu kum 6 thong thlak dingin bia an khiah tthan. Rampi ruahnak petu Daw Aung San Suu Kyi cu Daw Khin Kyi foundation kongkau ii sual an puh mi case chung ah eihmuar dohkalhnak zulh phung number 55 in sual an phawt mi case 4 caah kum 6 thong in tang ding in August 15 ah Nay Pyi Taw thonginn special biaceihnak zung in bia an chah piak tiah biaceih zung he neih niam mi nih an chim.
Case 4 chungah Nay Pyi Taw in လရောင်တောမြေ hmunhma he pehtlai in eihmuar nak case 3 caah dantatnak cu thong kum 3 cio in voi khat fonh in thlak a si.A dang case 1 simi Yangon,Bahan peng inn hmunhma kong ah sual puh mi eihmuarnak caah kum 3 thlak dingin an ceih piak ruangah a dih lak fonh ah kum 5 thlak ding a si. Daw Aung San Suu Kyi cu SAC nih hramhram in uknak a lak hnu tlaih a ton kaa in pehzulh in sual phawt nak case 6 ca zong ah thong kum 11 tla dingin ceih piak a si ii a tu an ceih piak mi he fonh ah cun kum 17 thlak ding a si lai. Credit: LCBN
ThawngDang Relchih: North Korea ram he pehtlaihnak ṭha deuh kan ser lai, tiah Russia President Putin nih a chim. Ramhnih kar pehtlaihnak ṭha kan sermi nih hin chawlehnak lei ah hlawknak tampi a chuahpi lai, tiah North Korea Independent day ni i Putin cakuat mi ah cun aa tel. North Korea le Russia cu Vawlei ralpi pahnihnak lio Japan ral in teinak kan rak hmuh hnu in kaphnih kar ah pehtlaihnak ṭha a ngeimi kan si, tiah Kim Jong Un nih cun a chim ve.
Ramdang hna nih raltuknak in siseh, tlerhkhonhnak a kan tuah ruangah tu bantuk in ramhnih kar pehtlaihnak ṭha kan sernak hi a si, tiah Kim Jong Um nih cun a chim chap. Russia nih Ukraine ram ramkulh pahnih cu a zalen mi ram an si, tiah a phuan hnu in N. Korea nih cun cu ramkulh pahnih cu phungning tein cohlannak a rak tuah.
RELCHAP: August Thla Zarhhnihnak, Karenni Ramkulh Chung Kahdohnak Ah SAC Ralkap 19 Hrawng An Thi. August zarh hnihnak, Karenni ramkulh chung kahdohnak ah SAC ralkap 19 an thi i, Karenni ralkap phufonh lei in ralkap pakhat nunnak a liam ve, tiah KNDF nih cathanh an chuah. August 8 le August 9 ah Shiataw(ရှားတော) pengchung SAC ralkap le KA, KNDF phufonh kar cu voi li tiang kahdohnak a chuak, cu kahdohnak ah cun SAC ralkap lei 8 an thi, tiah KNDF nih an thanh.
Hpruso(ဖရူဆို) peng ah SAC ralkap khah-lah-yiah 531 le Karenni hriamtlai phufonh kar cu Aug 9 ah, suimilam 3 tluk hrawng kahdohnak a chuak i, cu kahdohnak ah cun Karenni ralkap lei in ralkap pakhat a nunnak liam, tiah theih a si. August 9 ṭhiam ah, Demoso peng Sanpiah meng 6 khua ah SAC ralkap le KNDF battalion 9 kar kahdohnak a chuak i, SAC ralkap 5 an thi. Cu ni zaanlei ah cun Demoso palik sakhan cu KNDF nih luhhnawh in an kah ṭhan hna i, SAC ralkap lei a thimi an um, tiah an thanh. August 12 ah Ruphaekhu(ရူဖယ်ခူ) sang Baptist Biakinn pawng ah kahdohnak a chuak i, SAC ralkap pakhat a thi, tiah theih a si.
SAC ralkap hna nih kahdohnak a chuahnak khua pawng um mi khuami hna cu ralphaw ah an tlaih hna. Cupinah Loilinlay(လွိုင်လင်လေး) peng, Dawpapah(ဒေါပါပ) khua cu SAC ralkap nih vanlei in an kah caah tualchung mi pakhat a nunnak a liam i, 2 nih hliamhma an tuar, tiah KNDF nih cathanh an chuah.
