Related Articles
Mizoram Ah Myanmar Mi Pakhat Cu Kyats Sing 5000 Leng Man Bing He An Tlaih! India ram, Mizoram ramkulh khualipi Aizawl khuapi ah Chin miphun, Tedim peng Darkhai khuami Khup Za Tung, kum 42 sin in 428.04 gram a ritmi bing cu August 4 ah Mizoram palik le Assam Rifle nih an tlaih, tiah theih a si.
An tlaihmi bing cu Rupees sing 214 man a si i, Myanmar phaisa in sing 5770 leng a si. Myanmar ralzam hna a cohlangtu Mizoram ah Myanmar ram in rithaisii phorh lo ding in Chin hriamtlai phu, media le zatlang bu hna nih phihkhamnak an tuah ko nain atu le tu Myanmar mi hna sinin rithaisii an tlaih lengmang.
Atu bantuk ram boruak chiat lio caan cu caan ṭha ah i lak riangmang in phung lut lo sii zuar hi Mizoram um, Myanmar mi hna ca ah himlonak le thil ṭha lo a chuahter khawh tiah chimceih ngai a si. Mizoram i rithaisii tlaihnak kong ah hin a cawtu taktak le a ngeitu taktak nakin an kuttang ah a phortu hna cu an tlaih deuh hna, tiah theih a si.
Thawngdang Relchih: Kalay Peng Nihnih Chung Kahdohnak Ah SAC Ralkap 15 An Thi I, Mipi Ralkap 3 Nunnak A Liam Ve! Kalay Technology University thlanglei, chinmi umnak Thayarkung ah umhmun a khuarmi SAC ralkap hna cu a luancia August 2 khan Kalay-PDF battalion 1, 2, 3, 5, 6, 7, 8, 12 le Kalay pah-kah-phah, CNDF, CDF-KKG le RKDF phufonh nih nizaan August 3, zaanlei suimilam 5:30 in zaan suimilam 8:30 tiang an kah hna, tiah theih a si.
SAC ralkap nih hriamngan pehzulh in voi tamtuk an kah caah tualchung hriamtlai phufonh lei hnu an tolh i, nihnih chung kahdohnak ah cun SAC ralkap 15 hrawng an thih leng ah hliamhma tuar zong an tam. Tualchung hriamtlai phufonh lei Kalay-PDF in pakhat, pah-kah-phah phu chungtel in ralkap 2 an nunnak a liam i, minung 17 hliamhma an tuar, tiah Kalay PDF nih an thanh.
Nihin August 4, zinglei suimilam 9:00 hrawng zong ah Thayarkung khua pawng ah chunnitlak tluk SAC ralkap le tualchung hriamtlai phufonh hna cu an i kap, tiah theih a si. SAC ralkap nih Thayarkung khuachung innlo zong an khangh i, hrawhpiak hna, tiah Kalay PDF nih cathanh an chuah.
