Related Articles
Myanmar Sexy model minthang a si vemi Lulu Aung zong Kawlram chung ah cun a him ve ti lo tiah Chindwin News Agency nih cun a langhter. Model Lulu Aung hi Lai (Chin) miphun le bang nih cun kan theih tukmi a si. Hakha zongah a rak tlung bal cangmi a si.
Nai tan ah hi konghe pehtlai in SAC ralhraang nih Myanmar Sexy model a simi Thinzar Wint Kyaw le Nang Mwe San zong August 05 ah khan Case an rak tuahpiak hna. Cu case cu social media chung ah sexy hmanthlak le Sexy video duh paoh in nan phozar i Kawl nunphung nan hrawh tiah tubantuk in case an siampiak hna i tlaih dingin biachahnak tuah a si cang. Cu caah Model Lulu Aung zong a tubantuk case in tlaihkhih dingin langhternak an tuah cang.
Chindwin News Agency nih a langhterning ahcun hibantuk sexy hmanthlak le sexy video hna Social Media ah a phozarmi hna hi cu a sangbik dantatnak in dantat ding an si tiah a chim. Kawlram sining le Kawl nunphung vialte an hrawh i ningzak in an kan tuah a si tiah SAC ralhraang lei nih cun hi konghe pehtlai in an langhterning cu a si.
Thawngdang Relchih: Pakokku Thonginn Ah Mindat Khua In Tlaih A Tongmi 70 Leng An Chiah Hna: Magway ramṭhen, Pakokku thonginn ah Mindat peng in tlaih a tongmi 70 leng cu an chiah hna, cu chung ah thih hlan lo thong tla ding zong an i tel, tiah theih a si. Mindat peng cu SAC ralkap nih martial law an chiahnak a si i, Pakokko thonginn ah an chiahmi hna cu Mindat SAC ralkap biaceih zung nih bia an khiah piak hna i Pokokku ah an kuat hna.
“Pakokku thonginn ah a ummi chung in Mindat peng in a rak phanmi hi 70 an si. A luancia zarh zong ah 10 an rak phan chap. Thong tlami hna chung ah kum upa hna zong an i tel. A tlawm bik dan an tatmi hna hi rianhrang ṭuan le thong kum 3 tla ding an si,” tiah thonginn he naihniam mi sin in theih a si. Ralkap uknak tang in biaceih khawhmi sualnak hna cu SAC nih nawlpeknak(order) No. 3/2021 in 2021 March 15 ah cathanh an rak chuah.
Cu cathanh an chuahmi chung ah rampi rawiphiarnak, dohnak, cozah hlimhang thlaknak, ralkap rianṭuan dohkalhnak, ralkap sin rianṭuantu thlauhnak, Yazatatkyi section 505, zung rianṭuantu pakhat khat cu sual tuah ding in lemnak, a dik lomi thawngzamhnak hna aa tel, tiah theih a si.
