Related Articles
Hakha-Thantlang karlak thla cheu leng kahdohnak chungah SAC ralkap 50 leng an thi lai tiah CNF nih a ruahdamh. Chin ramkulh Hakha le Thantlang karlak ah Chin hriamtlai phufonh le SAC ralkap karlak ah kahdohnak a peh lengmang i August 16 tiang ni 18 chung kahdohnak chungah SAC ralkap 50 leng an thi CNF biachimnak nawl a ngeitu Salai Htet Ni nih media sin ah a rak chim.
SAC ralkap pawl cu July thla dongh hrawng in Hakha-Thantlang karlak ah a ummi Timit tiva ah kahdohnak an tuah i CNA le CDF phufonh nih an doh lengmang hna. “July 30 in August 16 tiang Hakha-“Thantlang karlak ni 18 chung kahdohnak hi SAC nih an khanghmi Thantlang khua sersiam ṭhannak timi tlangtar min put in hmunhma an kuah khawhnak hnga kahdohnak an tuahmi a si” tiah Salai Htet Ni nih People’s Spring ah a rak chim. Kahdohnak chungah Hakha ah hram a bunhmi SAC ralkap pawl nih hmun tampi in hriamngan kah an bawmh hna i Helicopter zong voithum a raa i kuan, zen hna an chap, kahdohnak vanlawng zong a raa ko nain nikhua a chiat ruangah a rak kir ṭhan.
“An mah lei a thimi an tam, kan ruahdamh khawhmi hi 50 leng an si. Hriam le kuan cheukhat zong kan lak khawh. Kanmah lei in minung 5 fak tuk loin an i hliam” tiah Salai Htet Ni nih a chim. Chin hriamtlai phufonh le SAC ralkap hna cu a luancia thla chungah Falam-Hakha karlah ah an rak i kap cang i atu thla chungah Hakha-Thantlang karlak ah pehzulh in an i kap ṭhan.
Thawngdang Relchih: Uknak a ṭhat lo lio kha caan ṭha la in mipi pawl a nehsawhtu pawl cu a ziizut nan si lai tiah CDF-Hakha nih a thanh. Dothlennak chungah uknak a tha a der tukmi kha caanṭha la in mipi pawl nehsawhnak, hramhram uktu pawl bantuk in thiltuahnak hna hmuh khawh a si caah cubantuk thil a tuahtu, cubantuk thiltuahnak he aa pehtlaimi pawl cu upadi ning in fak piin a ziizut an si lai tiah CDF-Hakha Council nih August 16 ah a rak thanh.
Chinland Defense Force-Hakha Council nih a tlaihmi Hakha peng ramri cu hramhram in uknak lak a rak si hlan 2021 January thla tiang fehtermi ramri ning in a um ko lai i khuate ramri hna zong thlennawnnak um lo tein cubantuk ṭhiamṭhiam in a um ko lai tiah cathanh ah a langhter. Mi cheukhat,cheukhat phu, cheukhat khuate hna nih mah miaknak ca, kan ram daihnak a hrawh ding, dothlennak a caan rauhter ding ruahchannak he a ruang tampi bunh in ramri lonhnak, lo vahnak, thing, meihol pawl a thithup in zuarnak, mipi tlerhnak hna tuah rih a si ahcun a ziizut nan si lai tiah theihternak a tuah.
