Related Articles
Thantlang Peng chung mizapi uknak tang ah a ummi kan naule fimcawnnak caah tiin anmah tein cauk pi (text book) an i chuah cang tiah The Chin Post nih a ttial. SAC ralhraang nih phungning loin nawlngeihnak an laak hnu in Thantlang peng chung hi ralzaam kan tam ngai, sianglairun siangngakchia hi 8,000 renglo an si tiah a ttial chap.
The Chin Post nih cun tihin an langhter “Thantlang Peng Nih Caan Karlak Cawn Ding Text Book Anmah Tein An I Chuah. Thantlang peng, mizapi uknak tang ah a ummi peng fimcawnnak zung nih Thantlang peng siangngakchia hna ca ah cawn khawh ding in text book chuah hram kan thawk, tiah nizan August 25 ah cathanh an chuah. Thantlang peng khua 51 ah sianglairun siangngakchia hi 8,000 leng an si i, fimcawnnak zung in siangcachimtu hna nih ca an chimh hna, tiah theih a si” ti’n an langhter ning cu a si.
Timit Kahdohnak Ah Kan Ralkap Hna An Ba, Kan Tha Dorh Awk A Ṭha Lo: Timit kahdohnak ah kan naule hna cu an ba ngaingai cang tiah ṭuanvo ngeitu pakhat nih The Chin Post ah a chim. Timit kahdohnak cu July 30 in aa thok i atu ah cun thlakhat a tling deng cang. Hi chungah miphun ralkap pahnih nih an nunnak an pek i SAC ralkap 50 hrawng an thi cang. Timit cu Hakha he aa naih tuk caah Hakha i SAC ralkap nih a langin hriamngan in an kah lengmang hna. Cun fawitein minung thazaang an chap khawh peng. An bat deuh tikah minung an i thleng kho colh lengmang. Hriamnam le zenkuan zong an herhzat in an i pechan kho.
Cun Timit kahdohnak hi hmundang he an i khat lonak cu lampi a rami bawh (ambush) in kah awk an ṭha lo. Ramtang hmunkip in SAC ralkap nih an fuh tawn hna i cucu miphun ralkap hna caah a harnak pakhat a si. Cun SAC ralkap hna hi hmunkhat lawngah si loin hmun dangdang ah hmunhma an khuar fawn. Cutikah miphun ralkap hna cu a dangdang ah i ṭhenṭhek a hau ve tawn i cucu an thazaang a dernak pakhat a si fawn.
Timit kahdohnak i ṭuanvo ngeitu pakhat nih cun “Kan tei khawh hna lo a si lo, kan sung lo ti khawh a si. Kan ṭhawl khawh rih hna lo hmanh ah an duhmi tuah kho loin cun kan ven khawh ko lai. Kannih caah cun kan umnak chuahtak lo tein kan venhim khawh hi kan teinak a si ko tiah ka ruah. Ralhrang caah cun an kan ṭhawl khawh lomi hi an sunghnak a si ko” tiah The Chin Post ah a chim.
Timit hi SAC ralkap nih Zophei, Lautu in Thlanglei Laitlang le Hakha lei karlak lamthluanpi an luhchuah khawhnak ding caah a biapi tukmi a si. Cucaah ralkap thazaang le hriamnam tampi chap in lak an i zuam pengnak a si. SAC nih Timit an lak khawh ahcun Thantlang i an hawile pawl caah an duhning in a herhmi bawmhnak an pekchanh khawh hna lai. Minung thazaang zong tampi an chap khawh. Thantlang ah SAC ralkap an tam, an ṭhawn ahcun CNF/A hmunpi ca zongah a him deuh lo ngaingai khomi a si.
Cucaah hriam a tlaimi kan ralkap hna lawng rinh loin ramchung ramleng mipi zong Timit kahdohnak caah thazaang kan chuah chinchin a herh hringhran ko. Timit kahdoh ah aa telmi kan ralkap hna caah ei-din ṭha, thazaang umnak le hriamnam ṭha kan chuahpi cio a herh. Timit hi SAC nih an lak khawh sual ahcun kan dirhmun a chia kho.
