Related Articles
Kalay Peng Nihnih Chung Kahdohnak Ah SAC Ralkap 15 An Thi I, Mipi Ralkap 3 Nunnak A Liam Ve! Kalay Technology University thlanglei, chinmi umnak Thayarkung ah umhmun a khuarmi SAC ralkap hna cu a luancia August 2 khan Kalay-PDF battalion 1, 2, 3, 5, 6, 7, 8, 12 le Kalay pah-kah-phah, CNDF, CDF-KKG le RKDF phufonh nih nizaan August 3, zaanlei suimilam 5:30 in zaan suimilam 8:30 tiang an kah hna, tiah theih a si.
SAC ralkap nih hriamngan pehzulh in voi tamtuk an kah caah tualchung hriamtlai phufonh lei hnu an tolh i, nihnih chung kahdohnak ah cun SAC ralkap 15 hrawng an thih leng ah hliamhma tuar zong an tam. Tualchung hriamtlai phufonh lei Kalay-PDF in pakhat, pah-kah-phah phu chungtel in ralkap 2 an nunnak a liam i, minung 17 hliamhma an tuar, tiah Kalay PDF nih an thanh.
Nihin August 4, zinglei suimilam 9:00 hrawng zong ah Thayarkung khua pawng ah chunnitlak tluk SAC ralkap le tualchung hriamtlai phufonh hna cu an i kap, tiah theih a si. SAC ralkap nih Thayarkung khuachung innlo zong an khangh i, hrawhpiak hna, tiah Kalay PDF (People Defence Force) nih cathanh an chuah.
Thawngdang Relchih: Japan Rammi Video Journalist Pakhat Cu Sualpuhnak Phun 2 In SAC Nih Taza An Cuai! Japan rammi video journalist le flim sertu pakhat cu sualpuhnak phun 2 in tazacuai a si, tiah SAC nih cathanh an chuah. Japan rammi video journalist le flim sertu Toru Kubota leng ah Yangon ramṭhen, South Dagon peng ah SAC ralkap uk duhlonak langhter in lamzawhnak a tuahtu minung 2 cu SAC ralkap nih July 30 ahkhan an rak tlaih hna, tiah theih a si.
Toru Kubota cu July 1 ah tourist visa in Thailand in Myanmar ram ah a rak lut. July 30 zaanlei ah South Dagon city mart pawng i minung 15 hrawng nih SAC ralkap uk duhlo in lamzawhnak a tuahlio cu vedio a thlak caah kan tlaih, tiah SAC nih an thanh. SAC ralkap kut in tlaih a rak ton ka ah, thlahpiak zau ding in Japan lei nih nawlnak an rak tuah, tiah theih a si. Toru Kubota cu rampi muichiattertu ti in section 505(A) in tazacuai a si, tiah theih a si.
Tamu in Kalaymyo Lei Ah A Kalmi SAC Ralkap Cu Tualchung Hriamtlai Phu Nih Bomb Puahhnawh Hna I, Ralkap 50 An Thi!: Sagaing ramṭhen, Tamu in Kalaymyo lei ah bomb thianhhlimh ding in a kalmi SAC ralkap motor 10 cu Tualchung hriamtlai phufonh nih bomb an puahhnawh hna caah SAC ralkap 50 hrawng an thi i, 10 hrawng cu fak ngai in hliamhma an tuar, tiah CDF – Tonzaang nih cathanh an chuah.
SAC ralkap motor run cu Tamu le Kaalymyo kar Mengtung 55 pawng ah KPDF, CDF-Tonzang le PDF-Yazagyo phu nih pa-de-ta bomb lung 30 an puahhnawh hna, tiah theih a si. Kalaymyo lei ah mithi phor motor le mizaw phor motor hna cu chun hnu suimilam 1:30 hrawng ah an phan, tiah Kalaymyo khuasa mi hna nih an chim.
Mandalay Ramṭhen, Madaya(မတ်တရာ) Peng Khuabawi Cu Hriamtlaitu Pahnih Nih An Kahthah: Mandalay ramṭhen Madaya peng khuabawipa cu nihin August ni 5 ah hriamtlaitu mi pahnih nih an thah, tiah tualchungmi sin in theih a si. Khuabawi U Khin Zaw (ဦးခင်ဇော်) cu aho theih lo mi hriamtlaitu minung pahnih nih Pistol in voi 4 an kah i a thi, tiah theih a si.
“SAC kut tang ah khuabawi rian ṭuan lo ding in tualchung hriamtlai phu lei nih nawl an rak pek cang,” tiah khuami pakhat nih cun a chim. Khuami pakhat nih cun, “Zeiban tuk hriamtlai phu nih dah khuabawi pa cu an thah ti fiang in theih a si rih lo. SAC ralkap nih khua pawnghrawng ah chekhlatnak an tuah,” tiah a chim chap. Mandalay ramṭhen Madaya peng ah hin a luancia July thlachung ahkhan SAC ralkap rian khinhmi a ṭuantu(သမဝါယမဦးစီးမှူး) pakhat cu thah a ton ruangah tualchungmi 50 leng SAC ralkap nih an rak tlaih bal cang hna. Credit: The Chin Post
