Related Articles
Lionel Messi le Neymar cu tutan kum 2022 Ballon d’Or cazin (shortlist) chung i players 30 thimmi ah an i tel ti lo. Argentina ram caah bochan bikmi Messi hi vawleicung Ballon d’Or tingco mi lakah a tambikmi a si i voi 7 tiangte Ballon d’Or hi a hmu cangmi a si.
Kan hnung season in Paris Saint-Germain ah aa tthial kha a si i voi 34 games aa celhmi chungah 11 goals a ngei asinain tutan Ballon d’Or cazin players 30 chungah aa tel ti lo. Amah team-mate a simi Neymar zong aa tel lo. Neymar hi kan hnung season ah khan PSG caah 28 games aa celh kho, aa hliam (injury) ruangah aa celh lo a tam deuh. Kylian Mbappe belte Players 30 chung langhtermi ah aa tel kho.
Voi 5th tiang Ballon d’Or a thlir kho ve cangmi Cristiano Ronaldo belte players 30 langhtermi cazin chungah aa tel. Anih hi kan hnung season ah khan Manchester United caah games 31 aa celh kho i cu chung ahcun 18 tiangte goals a ngei ve. Tutan 2022 Ballon d’Or cotu dingah zumh bikmi Karim Benzama hi kan hnung season chung ah khan 44 bakte goals a ngei i Real Madrid zong Champions League le La Liga hraipi a cawipi khawh hna. Nizaan tihni te zongah Super Cup zong Eintracht Frankfurt lakah teinak an hmu tthan i hraipi an cawi kho tthan cu zongah cun goal khat a ngei kho rih, Cristiano Ronaldo a chuah hnu ah Benzama hi a cawlcangh a ttha chin lengmang tiah pumpululh lei thiamsaang tampi nih chim le ceih a tong.
Real Madrid players chungah an goal keeper a simi Thibaut Courtois aa tel. Cun Champions League final ah teinak goal khat a ngeitu Vinicius Junior zong aa tel i 2018 Ballon d’Or teinak a hmumi Luka Modric le Casemiro zong players 30 langhtermi cazin an lang kho. Chelsea in an cawk tharmi Antonio Rudiger zong aa tel chih, anih kan hnung season i Chelsea an cawlcanghnak ah a min lang ngaingaimi a si.
Kan hnung season i Premier League ah goal tambik a ngei vemi Mohammed Salah zong a lang ve, Salah hi kan hnung season zongah assist ngei tambik a si, vanchiat ah Liverpool hi final ah voihnih an sung. Liverpool a team-mate a simi hna virgil van Dijk, Trent Alexander-Arnold, Luiz Diaz, Fabinho le Darwin Nunez zong an lang kho ve. Tottenham lei in Harry Kane le Heung-Min Son an lang.
AC Milan lei in Rafael Leao le an goal keeper a simi Mike Maignan zong player 30 langhtermi cazin ah an i tel ve, AC Milan hi kan hnung season i Serie A hraipi a cawimi an si. Cun Christopher Nkunku zong aa tel, anih hi kum 2021-22 Bundesliga Player of the Season ah thim mi a si. Bayern Munich player a simi Joshua Kimmich zong aa tel ve, Liverpool player hlun/tthing Sadio Mane zong a lang kho, anih hi a tu ahcun Bayern Munich ah a um cang.
Robert Lewandowski, a tu ahcun Barcelona player a si cang, zong a rak lang tthan, anih hi aa celhmi games nak in a goalmi a tam deuh, kan hnung season chungah khan Bayern caah Bundesliga le Champions League ah 44 games aa celhmi chung ah 48 tiang bak goal a ngei kho. Borussia Dortmund nih cawk tharmi Sebastian Haller zong player 30 cazin langhtermi chung ah aa tel, Haller hi kan hnung season i Ajax ah khan a cawlcangh a ttha ngaingai.
Manchester City in Bernardo Silva a lang kho, anih hi tukum chungah Premier League champion Man City hi a chuah taak men lai tiah zumh a si. Phil Foden zong aa tel i Kevin de Bruyne, Riyad Mahrez, Joao Cancelo le an cawktharmi Erling Haaland zong tutan Ballon d’Or players 30 min cazin langhtermi chung ah an i tel kho hna. Juventus in Dusan Vlahovic zong cazin langhtermi chungah aa tel ve, anih hi Fiorentina club ah season cheu tiang cu aa celh i cu hnu cun Juventus ah January khan aa thialmi a si.
2022 BALLON D’OR NOMINEES
- Thibaut Courtois (Real Madird)
- Mohamed Salah (Liverpool)
- Rafael Leao (AC Milan)
- Christopher Nkunku (RB Leipzig)
- Joshua Kimmich (Bayern Munich)
- Trent Alexander-Arnold (Liverpool)
- Vinicius Jr (Real Madrid)
- Bernardo Silva (Manchester City)
- Luis Diaz (Liverpool)
- Robert Lewandowski (Barcelona)
- Riyad Mahrez (Manchester City)
- Casemiro (Real Madrid)
- Heung-Min Son (Tottenham)
- Fabinho (Liverpool)
- Karim Benzema (Real Madrid)
- Mike Maignan (AC Milan)
- Harry Kane (Tottenham)
- Darwin Nunez (Liverpool)
- Phil Foden (Manchester City)
- Sadio Mane (Bayern Munich)
- Sebastien Haller (Borussia Dortmund)
- Luka Modric (Real Madrid)
- Antonio Rudiger (Real Madrid)
- Cristiano Ronaldo (Manchester United)
- Kevin de Bruyne (Manchester City)
- Dusan Vlahovic (Juventus)
- Virgil van Dijk (Liverpool)
- Joao Cancelo (Manchester City)
- Erling Haaland (Manchester City)
- Kylian Mbappe (Paris Saint-Germain)
Kum 2022 Ballon d’Or teinak a hmumi cu tukum October 17, Paris ah phuan a si te lai. A hodah na zumh bikmi a si, Messi le Neymar an lang lo va si kaw nang zeitindah na ruah, langh phu an si na ti maw an si loh na ti dah. Na hmuhning in comment rak pe veh.
