Related Articles
Chin ramkulh Mindat ah Pastor theihpinak tel loin facang cawk khawh a si ti lo tiah theih a si. Chin ramkulh Mindat khuapi ah SAC ralhraang hna nih mipi pawl an duh paoh in facang cawk an sianh ti hna lo, pastor theihpinak aa tel lawngah an cawkter hna tiah Mindat um mipi nih cun an chim.
Mindat khuapi i um pakhat nih a chim ning ahcun “Facang hi kan duh zat in cawk khawh cu a si ko. Asinain mah inn chung i chiah ding ah an siang lo. Kan cawkmi zat hi Biakinn ah an kan chiahter i cucu chumh ding zat a dih tik ah Pastor theihpinak in kan cawkmi cu kan va laak khawh tthan. SAC ralhraang nih hin kan hnung August 6 ah khan Mindat khuapi chungah facang tunkhat ah thong 40 an hauh i cuticun an zuar” tiah RFA ah a chim.
SAC ralhraang nih rampi nawlngeihnak an laak hnu in Kalay lei mipi ralkap tam ngaite cu Mindat khuapi lei ah an rak kai i CDf-Mindat he ttangtti in Ralhraang pawl cu an rak doh hna, kahdohnak zong kha a rak faak ngaingai. Cu hnu cun ralhraang nih ceilak a rak thlah hna i Mindat khuapi cu an laak hi a si, kha ri thok khan CDF-Mindat zong khuapi in an rak chuak.
Cu hnu cun CDF-Mindat hna cu Mindat khuapi leeng lawngte ah khua an sa cang, SAC ralhraang belte khuapi chungah hmunhma khuar in khua an sa. Cuti a si ruangah Mindat khuapi chung i an i ukning cang ah ralhraang pawl hi nawl an ngei taktak ti a si. Mipi nih facang an cawkmi hmanh an ei zat tiang lawng an chiahter hna. Mindat khuapi ah hin SAC ralhraang nih an zuarmi a caw lomi cu duh paoh in facang an i thleng kho lo tiah an chimchap.
