Khah: Nan Dawr Kip Ah CCTV Nan Chiah Hrimhrim Lai Ti A Si Hoi Cang

Tedim Peng, Khaikam Khuachung Mahle Dawr Cio ah CCTV Bunh Ding In Sipin Nih Cathanh An Chuah! Chin ramkulh, Tedim peng, Khaikam khuachung ah dawr tuah mi hna nih mahle dawr cio ah CCTV bunh ding in Sipin nih August 3 ah cathanh an chuah.

CCTV bunhter an si nak a ruang cu ramkhel buainak ruangah le mifir hna lak in i runvennak ding ah a a si, tiah an cathanh ah an langhter. Hakha khuachung dawr ngei hna zong nih mahle dawr cio ah August thla dih hlan ah CCTV bunh cio ding in Sipin nih cathanh an rak chuah cang.

Thawngdang Relchih: Sagaing Ramṭhen Chung Kahdohnak Ah SAC Ralkap 35 An Thi: Nihin August 4 ah Sagaing ramṭhen, Ayardaw peng le Myinmu peng aa tonnak Khuatkhun(ခွက်ခွင်း) khua pawng ah rallam a sialtu SAC ralkap 64 cu tualchung hriamtlai phu nih an kahdoh hna caah SAC ralkap 15 an thi, tiah Myinchain(မြင်းခြံ) Zero pah-kah-phah hruaitu Ko That Kyi nih a chim.

Sagaing ramṭhen chung ṭhiam, Taze(တန့်ဆည်) peng Byaitkyi(ဗျက်ကြီး) khua ah umhmun a khuarmi SAC ralkap le pyusawhṭi phufonh cu August 4 zinglei suimilam 1:00 hrawng ah tualchung hriamtlai phufonh nih an kahdoh hna caah SAC ralkap 10 an thi, tiah tualchung hriamtlai phu nih an thanh. “SAC ralkap le pyusawhṭi hna cu umhmun an khuarnak hmun in hmundang ah an zaam. A thimi ruak cu Leeng 2 in an thiar hna i, 10 nak tlawmlo an thi lai,” tiah khuami nih an chim.

SAC ralkap le pyusawhṭi phufonh nih umhmun an khuarnak sakhan cu Taze PDF battalion 6, battalion 8, battalion 10, battalion 16, KPK, TSR, Taze Tiger, PRLF, PLA, pah-kah-phah le pah-lah-phah phufonh nih an doh hna. SAC ralkap nih an kaltakmi 5.56 kuan 100 le bomb lung khat an lak, tiah theih a si. SAC ralkap nih umhmun an khuarnak Byaitkyi(ဗျက်ကြီး) khuami hna cu SAC ralkap le pyusawhṭi an kir ṭhan lai an phan ruangah khuami dihlak in an zaam dih, tiah theih a si.

Aung San Kwin Thilkuatnak Gate Cu SAC Ralkap Nih Caan Rikhiah Um Lo In An Kharter Hna!: Yangon, Aung San Kwin(အောင်ဆန်းကွင်း) thilkuatnak gate pawl cu SAC ralkap nih nihin August 4 in, caan rikhiah um lo in an kharter hna, tiah gate rianṭuantu hna sin in theih a si. Aung San Kwin(အောင်ဆန်းကွင်း) gate khar a si caah thil phak caan ah nan thil a phak lo ah cun, kan theithiam u, tiah gate rianṭuantu cheukhat nih social media in theihternak le nawlnak ca an tar.

A luancia June thla chung zong ah Yangon, Aung San Kwin(အောင်ဆန်းကွင်း) gate cu ni 3 chung SAC ralkap nih an rak kharter bal cang hna. Tu tan ah cun zeitik ah dah gate hon ṭhan a si lai theih a si rih lo, tiah gate rianṭuantu cheukhat nih an chim. Yangon Aung San Kwin(အောင်ဆန်းကွင်း) gate cu pengkulh hmunkip ah eiding le thilri tampi kuatnak ah hmanmi a si.

Pathein Thonginn Ah Thih-dan Pekmi Minung 2 Le Thih Tiang Thong Thlak Ding Minung 5 An Um!: Ayeyarwaddy ramṭhen, Pathein thonginn ah phungning lo in tlaih a tongmi ramkhel lei thongtla hna chung in thih-dan pekmi minung 2 le thih tiang thong thlak ding in bia ceihpiakmi 5 an um, tiah thonginn rianṭuantu hna sin in theih a si. Thih-dan le thih tiang thong thlak ding in biakhiahnak tuahpiak mi hna cu Insein thonginn in Pathein thonginn ah ṭhialmi an si i, thih-dan pekmi hna hi Yangon ramṭhen Shwepohkan (ရွှေပေါက်ကံ) myotit in Ko Kyaw Kyaw Naing le Ma Hlah Hlah, nupa an si tiah thonginn rianṭuantu pakhat nih a chim.

Thih tiang thong thlak ding in biakhiahnak tuahmi hna cu Yangon ramṭhen, Shwepyita(ရွှေပြည်သာ) peng in Ko Hlaing Min Kyaw, Ko Aung Phyo Twin, Taketa(သာကေတ) peng in Ko Zin Min Htun le Hlaingtaya(လှိုင်သာယာ) peng in Ko Zaw Win Myint le Ko Aung Ko Ko hna an si. “Thih-dan pekmi nupa hna cu September thla, 2021 khan Pathein thonginn ah an phan. Thih tiang thongthlak dingmi hna cu January thla, 2022 in Pathein thonginn an phan ve. An dihlak 7 ning in Insein thonginn biaceihzung nih biakhiahnak a tuah hnu ah Pathein thonginn an an phan,” tiah thonginn rianṭuantu pakhat nih a chim.

Biakhiahnak tuahpiak cangmi ramkhel lei thongtla 7 hna cu, thongtla dang he hmunkhat ah chia lo in a dang tein an chiah hna, an ngandamnak zong a ṭha ko, tiah a chimchap. Myanmar ramchung thonginn hmunkip ah thih-dan pek ding in biakhiahpiak a tongmi dihlak hi 70 leng an si cang, tiah AAPP nih a thanh. Credit: The Chin Post

About admin

Check Also

Mizoram Ah Kawlram Minung A Thattu Pa Pakhat An Tlaihkhawh Cang

Mizoram Ah Myanmar Mi Pakhat A Thattu An Tlaih Khawh: India, Mizoram ramkulh Aizawl ah …

Leave a Reply

Your email address will not be published. Required fields are marked *