Related Articles
Mizoram Palik Nih Myanmar Rammi Pakhat Sin In Rupees Sing 600 Man Rithaisi An Tlaih! Mizoram palik nih Aizawl khuapi ITI sang, Wold Bank Road ah check hlatnak an tuah i, Myanmar rammi pakhat sin in Methamphetamine(ritsii) tlang 20,000(2kg) he nizan August 29 zanlei ah an tlaih, tiah theih a si.
Ritsii tlang a phortu pa hi Sagaing ramṭhen, Kalaymyo Tahan F-group ah a ummi Malsawmdawnga (kum 30) a si. Anih hi Aizawl khuapi Hunthar sang ah a ummi a si, tiah Mizoram palik nih an thanh. Malsawmdawnga sinin an tlaihmi sii tlang cu Rupees sing 600 leng man a si i, kyats in cun sing 20,400 man a si. Tlaih a tongmi Malsawmdawnga cu upadi ning in dantatnak kan tuah lai, tiah Mizoram palik nih cathanh an chuah.
Tuzing Sml 6:30 Hrawng In Hakha Khuachung Ah Kahdohnak A Chuak! Chin ramkulh khuapi Hakha thar lamruk tonnak ah nihin August 30 zing sml 6:30 hrawng in kahdohnak a chuak, tiah theih a si. “Nihin zing sml 6:30 hrawng ah Hakha thar lamruk tonnak ah kahdohnak a chuak. Meithal thawng le bomb thawng a than tuk caah kan lau tuk i, leng kan chuak ngam lo,” tiah min langhter a duh lomi pakhat nih The Chin Post ah a chim.
Suimilam cheu chung hrawng kahdohnak a chuak. Lamruk tonnak ah a ummi SAC ralkap pawl va bawmh dingah motor pakhat nih ralkap a phorh hna i, Hakha thar lamruk tonnak ah an ra. Zing sml 8:00 tiang ah motor cu a kir rih lo, tiah tualchung mi pakhat nih a chim. A luancia August 10 ah minister pawl umnak inn pawng le Hakha thar meithat zung pawng hrawng ah kahdohnak a rak chuak cang. SAC ralkap nih hriamngan an kah caah Hniarlawn khuami Pi Chia Hnem a inn a khen i, Pi Cia Hnem zong a nunnak a rak liam.
Monywa Ah SAC Ralkap Motor Nih Tualchung Mi Pakhat A Pahsual Caah A Nunnak A Liam: Sagaing ramṭhen, Monywa ah, nizan August 29 ahkhan tualchung mi pakhat cu SAC ralkap motor nih a pah sual caah a nunnak a liam, tiah tualchung mi pakhat nih a chim. Monywa, Nah Mah Kha(နမခ) umnak Alone peng bazar hmai ah nizan zanlei sml 4:17 ah SAC ralkap motor pakhat nih tualchung mi pakhat cu a pah sual caah a hmun ah a thi colh.
Monywa khua ummi pakhat nih cun, “Bomb puahhnawh kan tong sual lai, tiah motor cu rang tuk in an khalh tawn i, cuti rang tuk an khalh tawn caah atu le atu mi an pah lengmang hna. August 29 zanlei zong ah ralkap motor nih cycle in aa chawkmi pakhat cu a pah. Cu hnu caan tlawmpal ah ralhrang le Pyusawhti pawl cu civil thuam i hruk in meithal he an ra. Motor in pah sual a tongmi pa cu Nah Mah Kha sii-inn ah a nunnak a liam,” tiah a chim.
Motor pah sual a tongmi pa a chungkhar cu ralkap nih nawlpatnak zong an ngei lo i, taza cuai khawh lo ding tiang in ralkap nih an kham hna. August 28 zong ah SAC ralkap motor nih tualchung mi voi 3 a pah hna. Hihi hramhram in an pahmi hna a si ko, tiah a chim chap. SAC ralkap pawl cu Monywa khua chung ah humhimnak an la i, lam kam ah i thuhnak ding inn an sa, vawlei an rual. Motor zong in nifatin an i chawk. An zumh set lomi hna cu motor in an pah hna, tiah theih a si. Credit: The Chin Post
