Related Articles
HBDO-Hakha Nih Mandalay Ah Mizaw Harsa Hna Caah Riahbuk An On Cang. Pu Cung Hu hruainak in dirhmi Hope Blood Donor Organization (HBDO-Hakha) nih Laitlang in Mandalay ah damlo ruangah a phan i tlunnak a ngei lomi mizaw a harsa khunmi hna caah riahbuk cu August 24, 2020 ah an on cang tiah theih a si.
Pu Cung Hu nih cun “Caan laak in Cancer zawtnak aa thlopmi hna, khuaihlai ruangah caansau i thlop a haumi hna, siibawi thiamsang deuh ruahchan in Mandalay ah zawtnak a vung i chekmi hna nih thadam le hnangam tein hi hmun ah hin nan rak i diin kho. Mizaw a harsa khunmi le tlunnak aa harhmi hna caah Bawipa nih a kan timh piakmi mizaw riahbuuk a si” tiah a Facebook ah a tar.
Hi mizaw riahbuk ah riah man a um lo, innchung coka hmanmi thilri vialte a tling dih. Facang le chiti tiangin a um cia. Kawlholh a thiam lomi hna ca zongah lungretheih ding a um lo. Mandalay ah a ummi Lai (Chin) pastor pakhat khat nih a herhning in umkalpi a si lai. Mawṭaw in thlah le don a si lai i datsi man belte mah tein i rin a si lai tiah theih a si.
Pu Cung Hu nih cun “Mizaw nih hman an duh cang caah a rannak in ka onmi a si. Um khawh a si cang ko” tiah a chim. A herhmi thilri tam deuh cu tlamtling in a um cang nain a tanglei hna hi a tling rih lomi cu an si.
1. Aircon (1) = 800,000/-
2. Thil suknak = 700,000/-
3. TV 43″ = 700,000/-
4. Bizuu. = 300,000/-
5. Cauk Bizu = 150,000/-
6. Cabuai. =250,000/-
HBDO-Hakha cu Pu Cung Hu nih amah tangka hmangin 2004 ah a rak dirhmi a si i mizaw tampi thisen peknak in an bawmh cang hna. Atu tiangah ramchung ramleng in mah ti khawhtawk in HBDO rianṭuannak ah aa telmi an um pah len. Pu Cung Hu nih cun “Kan rianṭuannak caah minung pakhat nih kumkhat ah US$ 12 in i tel cio awk ah kan sawm hna” a facebook ah a tarchih. HBDO rianṭuannak ah tel ve a duhmi paoh nih +959400305298 le facebook-Cung Hu Blood ah pehtlaih khawh a si.
HBDO nih cun Hakha zongah khuate lei in a rak i rami mizaw a harsa khunmi le tlunnak a ngei lomi hna caah riahbuk an rak sak cang. Atu i Mandalay ah an sakmi he cun mizaw riahbuk hmunhnih ah an sak cang tinak a si. (Kan pupa nih “Kutte zawngza” an ti bang HBDO rianṭuannak ah kan ti khawh tawk in i tel cio hna usih). Credit: The Chin Post
