Related Articles
Timit lei kahdohnak caan a sau cang, kan ralkap an thaba, furpi aa lim rih lo caah ruahti a ko ngaingai rih lo.
Caangvat le fikfa cu relcawk loin anmah pawt in sum le bengh cawk loin an rak chuak. Thing a hnawng, thingaikhon an ngeih ve lo caah chuankhin a har, tirawl a hmin le thaw an ei khawh lo caah ralhrang kuanpi khuante lakah an paw nuam kho lo.
Hi Timit kahdohnak zeican rauh lai aa hngal lo, cucaah “Operation Timit” caah/ti in ramleng kan pale u, Vaurawng phu hna nih fund vun kawl kho ah a ttha tuk ko hnga. Ralhrang nih Timit hlei hi, Ton 30 rit dawl/khaan kho in donh an i tim, Motor rual pi in Thantlang peng cul le Victoria Camp nam an duh, a ruang cu Thantlang peng cu zapei kauh te lawng ralhrang nih a control, 97% cu mipi hmunhma dih si caah Halkha ဒု တိုင်းမှူး a ningzak, Naypyidaw ah report pek awk a ngei lo, a ralhrang bawi hna lakah a mithmai a bi.
Cucaah Timit hleidonh i TT peng vialte lak le control aa timh peng caah opretion Timit hi caansau pi a awh khawh caah Operation Timit caah ti in kan pale hna nih fund tung dirh kho ulaw. Cattial tu pumpak hmuh ning si. Hmaanthlak hi Timit lei um, Chinland ralkap umkal lio a si. Credit: Salai Williams Hlawnceu
Thawngdang Relchih Hmanh: Chin Ralkap Kah An Tonnak Yinmabin Kahdohnak Kong Thawng Thar(Updated). Sagaing ramṭhen, Yinmabin peng, Yinpaungtai(ရင်ပေါင်တိုင်) khua cu dalan thawngpeknak ruang ah SAC ralkap nih van lei kahdohnak a tuah i, thawngpetu cu theih a si cang, tiah Yinmabin pengkomh chimphuannak nawlngeitu Bu Myait Ko nih a chim. Chin ralkap hna nih hriamthil an phorh ah, an i tonnak hmun Yinpaungtai(ရင်ပေါင်တိုင်) khua le Pahtuta(ပုထိုးသာ) khua telh in khua 3 ah SAC ralkap nih nizaan August 11, zaanlei suimilam 3:00 hrawng ah van lei in kahdohnak a tuah, tiah Kawl media nih an langhter.
“Mi-35 pahnih le Mi-17 pakhat tiin helicopter 3 hmang in Yinpaungtai(ရင်ပေါင်တိုင်) khua le Pahtuta(ပုထိုးသာ) khua telh in khua 3 cu hmunkip ah an kah. Cu hnu ah Mi17 nih minung thazaang a chap i, zaanlei suimilam 3:00 hrawng ah Helicopter pahnih nih minung thazaang a chap ṭhan. Zaanlei suimilam 5:20 hrawng ah Mi helicopter pakhat le Mi35 pakhat nih kahdohnak a tuah ṭhan,” tiah helicopter in kahdohnak a tuahnak kong cu Bu Myait Ko nih a chim.
Hriamthil phortu hna an i tonnak ding hmunhma kong, Monywa nah-mah-khah sin ah thawng an peknak audio file cu khuami nih a hlankan in an theih caah, motor 2 in i tonnak ding hmun cu ṭhialnak an tuah ṭhan nain, SAC ralkap lei nih an i ṭhialnak hmun lei tiang vanlei in an kahdoh hna, tiah an ṭial.
“Hi thilcang kong ah a caan za rih lo kan ti caah thawng thanhnak kan tuah rih lo, Monywa nah-mah-khah sin ah thawng an peknak audio file tiang kan sin ah a phan,” tiah Chindwin ṭangrual phufonh committee ṭuanvo ngeitu le Yinmabin pengkomh ṭuanvo ngetu Bu Myait Ko nih Than Lwin Khet ah a chim. Cu thilcang kong he pehtlai in thawngpetu phu chungtel dalan pakhat cu tualchung hriamtlai phu nih an tlaih i, bia halnak kan tuah tiah Yinmabin tualchung hriamtlai phu chungtel pakhat nih a chim.
“Hriamthil a phortu Chin ralkap chungtel 80 chung ah minung 76 cu hmun pakhat ah an i tong dih cang, minung 4 cu kawl cuahmah lio an si,” tiah Bu Myait Ko nih cun a chim. Chin ralkap hna chung ah CDF-Mindat in ralkap 20 an i tel i, cu chung ah minung 2 an tlau, tiah an langhter. Yinpaungtai(ရင်ပေါင်တိုင်) khua luhhnawh in kahdoh an ton ruang ah tualchung hriamtlai phu minung 7 an nunnak a liam i, hriamthil zeimawzat kan lakkhawh tiah SAC ralkap media hna nih thawngthanhnak an tuah nain, nunnak liammi kong ah tualchung hriamtlai phu lei nih fehternak an tuahmi a um rih lo.
Nihin August 12 ah Yinpaungtai(ရင်ပေါင်တိုင်) khua cu SAC ralkap nih Helicopter in minung thazaang a chap, zaanlei suimilam 4:00 luan hnu ah khuachung an khangh, tiah tualchung mi nih an chim. Atu tiang ah Yinpaungtai(ရင်ပေါင်တိုင်) khua ah cun SAC ralkap 150 hrawng umhmun an khuar i, nihin August 12 zaanlei hnu tiang ah van lei in kahdohnak an tuah rih, tiah theih a si. (Than Lwin Khet). Credit: The Chin Post
