Related Articles
Ukraine ralkap in aa din cangmi (pensioner) pakhat nih Russia Jet Vanlawng, £74 million tluk man a simi cu tla lak in a kah tiah Express nih a langhter. Atubantuk in ralkap pension a la cangmi nih SU-35 jet vanlawng pi, a rifle bak in a thlaak khawh ko cu Vladimir Putin hrimhrim a thin a alh in a alh tuk lai tiah langhter chih.
Hi Russia jet vanlawng hi a ttha taktakmi a si tiah an chim, vawleicung chawlehnak ah “vawleicung-ateitu” tiah min tiang zong an bunh i £74 million tluk man a si, a tam lengluang ko. Hi raltuknak jet hi buaihram aa thok in Ukraine ramchung, kahdohnak a tam deuhnak hmun ah thlah (zuanter) lengmang a si. Hi jet vanlawng hi zeitluk in dah a tthat tiah cun chanthar jet vanlawng ah aa tha bik pawl a si lai ti tiangin an chim, a ran ning le a hmuitinhmi a khenh tthatning tibantuk a ttha tuk hringhran khi a si.
Cutluk i Russia nih bochanmi jet vanlawng pi cu Ukraine ralkap in aa din cangmi ram a vaihnak rifle tein a tthlaak khawh ko cu khuaruahhar ngaingai a si ko, Zeiltuk in dah Russia President Putin hrimhrim a thin a linh lai i a lung a hei fah hnga. Video an thlahmi ah Ukraine’s State Guard Service asimi Valeriy Fedorovych nih a chim ning ahcun hi ralkap pensioner nih cun Russia jet vanlawng kah a timh ah hin a inn cungah a kai cuticun a kah hi a si tiah a chim. A um nak khuate a rak kah lengmang tikah tubantuk in amah inncung kai in tla lak in a kah hi a si.
Ralkap pensioner pa nih a chim ning ahcun “kan umnak hmun hrawnghrang a rak kah lengmang tikah kaa tuar ti lo i inn cung ah cun ka kai” tiah a chim. “Ramvaihnak ah ka hmanmi rifle cu ka laak i ‘bang’ tiah ka kah ko, cu tlawmpal ahcun Russian Su-34 jet vanlawng pi cu a tla riangmang ko” tiah putar pa nih cun a chim. Video an rak thlahmi ah cun SU-34 jet vanlawng pi vawlei lei ah a tla thluahmah ko, vawlei a phanh khi cu aa rawk dih. (Video zong a um chih nain copy kan tuah kho lo). Cu video ah cun a kaaptu ralkap pensioner Mr Fedorovych zong a rifle a liang ah aa chiah i a kal lio pi cu a lang ve. A thilri chiahnak Garage ah Russia jet vanlawng a hrawhmi tthenkhat hna cu aa chiah.
Hi thil a can hi kan hnung August thla ah khan a si cang. Hi thawngpang an theih le cangka, Pensioner tarpa zong mintthatnak medal an pek colh. Ukraine ram i State Border Service lei nih Mr Fedorovych cu an chawnh colh i “hero” na si tiah an thangtthat colh, ramri na venhim caah lawmhnak kan rak chim tiah langhter. Hibantuk thil a can hi a voikhatnak a si lo a kumthok February thla ah khan ralkap pensioner pakhat nih Zinaan a phurmi Russia mawtaw ngan pakhat cu an inn lam an tan cuahmah lio ah puak lak in an rak kah bal cang hoi.
