Related Articles
Mandalay ah thonginn (prison) mawtaw pakhat a kal cuahmahmi cu an kah caah thongtlami chungin tthenkhat an zaam kho tiah Kawlram chung media tthenkhat nih a langhter. Hi a zaammi hi ramkhel lei ah a cawlcang ngaimi an si tiah an ttial chap.
September 29 zinglei ah khan Chauhse police station in Mandalay center thonginn lei a kalmi cu Mandalay chung i um Amarahpurah township hrawngah cu mawtaw cu tualchung hriamtlai phu (PDF) hna nih lam lai ah an rak kah i ramkhel lei a cawlcangmi thongtla minung 8 chungah minung 2 cu an chanhchuah khawh hna tiah thawng theih a si. Amarahpurah township i PDF hruaitu pakhat a simi Boe Nyi Lin nih cun “thawng an kan thanhning bantuk tein lam ah cun kan rak bawh hna, cuticun kan kah hna. A hramthok ah cun thongtla minung 8 cu an dilak in an chuak kho nain minung 6 tu cu an tlaihkhawh tthan hna, mawtaw chung ah a um mi palik pahnih cu a hmun lila ah an thi colh” tiah a chim.
Cu thongtla phurtu mawtaw cu a hmai lei ah driver telh in palik minung 3, a hnung lei ah palik 4 an si i cu hna cu tualchung hriamtlai phu Revolution army nih cun an kah hna cu a si. Cu lak ah thongtla minung 2 cu an chanhchuah khawh hna hi a si tiah theih a si. Boe Nyi Lin nih cun “kan chanhchuah khawhmi hna minung pahnih cu hmun himnak ah kan chiah colh hna. Kan thinphaanmi le kan ttihmi pakhat tu cu a taangmi minung 6 hi zeitindah an tuah hna lai tihi a si, thahkhawh zong an si tikah kan lungre a thei ngai ko. Hihi a tulio Kawl ralhraang nih cun an tuah tawnmi thil a si tikah kan ruat ngaingai ko hna” tiah a chimchap.
Hi ramkhel lei thongtla minung 8 hi Mandalay center jail in biaceih zung lei ah kalpi mi an si, cu chung ahcun Chauhse police station ah an chiahmi hna a si i cu hnu ahcun Center jail lei ah an kir tthan hi a si i an kir lei ah tubantukin tualchung hriamtlai phu nih an rak kahnak hna hi a si tiah media tthenkhat nih an langhterning cu a si.
