Related Articles
Hibantuk thawngpang vun theih ko cu lung a nuam lo hringhran, kan sikhawh chungin heh tiah Kawl ralhraang cu kan doh ve leen ko, ngakchia in tar tiang nih an nunnak tiang an peek, nunnak a liammi hrim an tlawm ti lo. Cubantuk in ttan kan laak cuahmah lio caan ah Mon Peace and Defence Force (MPDF) cathanh chuahning cu lau lo awk a ttha lo.
Mon Peace and Defence Force (MPDF) nih cun nihin thok in Min Aung Hlaing nih a hruai cuahmahmi Kawl ralkap hna he rian kan ttuantti cang lai tiah cathanh an chuah hi a si. Mon Peace and Defence Force (MPDF) phu hna hi New Mon State Party (NMSP) in a chuakmi phu an si i tubantuk in Kawl ralhraang he rian kan ttuantti cang lai tiah cathanh an vun chuah tikah Kawl ralhraang a dirkamhtu mipi hna nih cun an fak taktak hna i sunglawi ngaiin an rak don hna, Social media kenkip ah comment tthattha an pek hna.
Atubantuk in nihin cathanh an chuahmi konghe pehtlai in MPDF cathanhmi ah an i timhlamhning hmun thum in an langhter chih. Cu hna cu a tu a kan hruaitu Commander-in-Chief hi kan thlen lai tiah an ttial, cu le cangka cun Kawl ralhraang caah Border Guard Force rian kan tlaihpiak colh hna lai i tiah an ttial, cun kan nih MPDF nih hin ralhraang (tapung) cawlcanghnak vialte cu kan doh i a sikhawh chungin tualchung mipi hna he rualrem tein khua kan sa tti lai tiah an ttialchih.
Kawl ralhraang he rian kan ttuantti lai tiah cathanh MPDF nih cun an vun chuah tikah mipi tampi an lung a faak cio. Hi ti cathanh an chuah hi cu Kawlram mipi kan intuarning, kan mitthli, kan lungfahnak vialte hnu an kan chit bantuk a si i, anmah minung (mipi) lila he i do ding in cathanh an chuahmi bantuk ah kan ruah ko tiah mipi an ngaih a chia tiin Chindwin News Agency nih cun a langhter.
