Related Articles
Tulio Kawlram kan sining, boruak pi cu a mizeihmanh nih theih ciomi le hngalh ciomi a si ko buah biatak tein kan i ralrin cu a herh taktak ko. Kei cu zeibantuk tualchung hriamtlai hmanh he kaa pehtlai lo tiah hnangam tuk in um awk zong a ttha lomi kan si, Kawl ramchung ah a um rih komi caah cun a khoika kan kalnak kip ah kan i ralrin taktak a herh.
Kawl ralkap nih tlaih an kan duh ahcun an kan tlaihkhawhnak dingin a lamkip an kawl ko lai, kan hmanmi kan mobile phone in maw asiloah kan i hrukeihmi angki le tawhrolh in maw asiloah a umtu hoiher in dah ti kha a si ko. Tutan zong hi Myanmar ramchung, Mon State ah tlangval no pakhat cu a baan i tattoo aa suaimi ruangah Kawl ralkap nih an tlaih tiah Chindwin News Agency zong nih a langhter cang.
Tattoo ruang te bak ah an tlaih ko, a cunglei bantukin ka van langhter duh bikmi cu a tu i tlaih a tongmi tlangvalpa zong cu thil dang zeihmanh ah si loin a baan i tattoo aa suaimi ruangah sual an phawt i an tlaihmi kha a si ko, tlaih an kan duh a si ahcun a lamkip an kawl ko lai ka van timi kha a si. A tu an tlaihmi tlangval pa zong cu Paung khua ah khuasami a si i a orhlei baan ah “Nwe Oo Revolution” timi aa ttial caah an tlaihnak hi a si i Kawl ralhraang nih cun hi a baan ah aa suaimi he pehtlai in tualchung hriamtlai phu hna he pehtlaihnak a ngei hrimhrim lai tiah an zumh caah a si tiin Chindwin nih cun a langhter.
An tlaihmi tlangval pate hi a min ah Mr Wai Yan Soe tiah theih a si, a orhlei baan ah hin “Nwe Oo Revolution” tiah aa suai i a sullam cu Nwe Oo Dothlennak ti kha a si ko. Hi tattoo aa suaimi ruangah tualchung hriamtlai phu hna he pehtlaihnak na ngei tiah sual an phawt i caan saupi thong an thlaak sual lai tiah thinphaan a um ko tiin Chindwin News Agency nih cun a langhter.
