Related Articles
Bike (motorcycle) mawnghnak in chungkhar a zohkhenh i a donghnak ahcun minthang milaar tiang ah aa chuahmi Vietnam ngaknu note. Hmanthlak kan rak langhter bangin hi nungak note hi harsat ruangah Bike mawngh aa hlawh i minthang tiang a chuakmi a si.
Amah hi Vietnam miphun a si i kum 21 tluk hrawnghraang te lawng a si rih, a min ah Pham Thi Hang tiin theih a s. Aa zuamnak le a teimaknak nih minthang le laar tiangah a chuahter tikhawh a si. Cun Pham Thi Hang hi chungkhar harsa/sifak in a tthanglianmi a si i tubantukin Vietnam rampi tiang nih theih le hngalh ah a chuahkhawh hi amah aa zuamnak hrimhrim a si ko tiah media tampi nih a langhter.
Pham Thi Hang hi cathiam kho ngaimi a sinain chungkhar harsat tuk ruangah sianginn zong a peh kho ti loin kum 18 a si ah Hanoi khuapi ah i hlawh dingin a kal i luhmehnak dawr ah rian a rak ttuan. Hmanhsehlaw cu a rianttuanmi hlawh nih cun a chungkhar zohkhenhnak ei le din tibantukah aa deih ti lo. Cuti a hlawh cu a tlawm deuh caah Bike (motorcycle) mawngh in rian ttuan hram aa thok i bike cun mipi a phurh tawn hna.
A hmanthlak kan langhter bantukin a tungtai le a muisam nih a pek i aa dawh tuk caah mipi nih uar ngaingaimi ah a cang i mipi nih fuh le panhmi ah a hung i chuah, cuticun hman hna an thlakpi lengmang. Hman an thlaakpimi tete cu Social media (online) kip ah an phozar hna i laar hram a vun thok cu a si. Cu hnu cun hmanthlak lei model ah a lut i Vietnam rampi ahcun minthang le laar taktak ah aa chuah.
Pham Thi Hang nih a timi cu “Nan chungkhar hi biatak tein daw hna uh, zohkhenh hna uh. Lung diriam tein caan hmang tawn uh law nan chunmang hna cu tling kho dingin i zuam cio uh. Kan i chir lo nak hnga kan no lio caan hi ttha tein hmankhawh cio i zuam uh” tiin forhfial pah he a chim. A ti rihmi cu kei cu ka pasal ding ahcun ka chungkhar a dawmi bak ka duh ko tiah a chim chap.
