Related Articles
A tanglei i hmanthlak kan rak langhter bantuk in hi hna chungkhar sining le boruak cu tulio Mizoram ah a linsat taktak lio a si, khat lei kam cun zaangfak taktak khi an si. An sining le an tuarning cu Social Media kip ah thlahdarh a si tikah mipi hna thinlung ah rian a ttuan ngaingai i bawmhnak tete zong an hmu kho ve lengmang.
Chungkhar ah nu bik hi a min ah Hlimpuii tiin theihhngalh a si i anih hi a kal lei a tthat lo caah damlo ngai in caan sau nawn inn lei ah a rak i thlopbul cang. Annih hi Lawipu BSUP ah a pasal le fapa he tiin khuasami an si i siizung lei panhnak phaisa an ngeih lo caah inn ahcun aa zohkhenhmi an si. Asinain July 30, 2022 ah khan an nubik cu a zual tuk cang caah inn pa chakthlang nih taxi an hlaanpiak hna i Aizawl Hospital ah an kalter hna cuticun ICU ah ventilator hmanter in an chiah colh ti a si.
An nubik Pi Hlimpuii damlo a si pin ah a pasal hi stroke ruangah a thinlung hi hawi thinlung a keng lo tiah an chim, a fapa zong cu Hydrocephalus zawtnak a ngeih caah a luu hi a tthang i kal kho loin a um, a holh zong holh kho lo i khua zong tthittha in a hmu kho lo. An pafa bak cun cu ti an si tikah an nubik Hlimpuii zong siizung ah an umpi kho lo i lungrethei ngai in innpa chakthlang an chiah hna tiah an chim. Khat lei an sining le tuarning cu social media kip ah phozar a si tikah bawmhnak phaisa tete zong an van hmu pah lengmang tiah an chim.
Cuticun caan saulak te Aizawl Hospital i ICU ahcun zohkhenh peng a si, ni 60 chung deng cu ICU ah zohkhenh a si hnu ah September 29, 2022 suimilam 3:05 AM ah khan a pasal le a fapa cu a liam taak hna tiah theih a si. Social Media zongah phozar cu an si ko nain bawmhnak an hmuhmi tete nih cun siizung a um caan a sauh tikah zeihmanh a deih ti lo tiah an chim, khat lei ah a pasal le a fapa zong bochan awk ttha loin anmah lila tu bawmh a haumi an si fawn. A fapa le bang hi cu kal a duh caan ah hruai chom a haumi phun khi a si, an nubik a dam lio ah hin cun amah bak nih a zohkhenh tawn hna tiah an chim.
Mizo le Chin miphun cu Khrihfa zumhnak a ngeimi kan i hngalhnak ah, kha vialte siizung a um chung an zohkhenhmi cu Aizawl Hospital lei lutlai hna nih Pathian min in kan ngaihthiam ko hna tiah Zo Inspiration timi Facebook Page nih a langhter, Zo Inspiration page hi Mizoram miharsa tete a bawmchantu taktak a si, a tu Hlimpuii chungkhar hna kongkau zongah bawmhnak tete hi anmah nih an tuahmi deuh ngawt a si. Aizawl Hospital lei zongin a kal taakmi a pasal le a fapa zong kan zaangfaak hringhran ko hna tiah an chim. Pi Hlimpuii hi Aizawl Hospital i ICU ah an chiah hi ni 60 leng cu a si lai.
Siizung i a um lio ah hin bawmchaantu tete an tam ngai, cu vialte zong cu amah zohkhenhnak caah hman dih a si, cu zong nih cun a deih hrimhrim lo tiah tawlreltu lei in Zo Inspiration nih cun an langhter i an dihmi dihlak phaisa hi an langhter lem lo nain kan van tuaktaan tikah India phaisa in ting 10 lengkai cu a si hrimhrim lai tiah kan zumh tiin an langhter chap. Cu vialte zong cu Siizung lei in ngaihthiam an si. Minung ciocio kan rak i dang tawn ko, an pafa sining zoh hrim ah hin ngaih a chia ko. A fapa nih hin ka pa nih a kal taak sual lai tiah a angki hi a phoihter tawn hna tiah an chim.
