Related Articles
SAC ralhraang bomb puahmi nih chungkhar pathum an i hngilh cuahmah lio ah a tlaak hna i a hmun lila ah an nunnak a liam colh tiah Chindwin News Agency nih cun a langhter. Kawlram mipi kan boruak/sining cuanh ah hin cun minung sinak in celh awk a ttha tawn lo, hi thawngpang hi Rakhine ramchung ah a si tiah theih a si.
Kyaukdaw ah hmunkhuarmi Kawl ralhraang The Light Infantry Battalion-09 hna nih 120 mm miakpi cu voi hra hrawng an kah i Pihsi khuate ah cu bomb cu a tla tiah theih a si, chungkhar pathum aa hngilh cuahmah liomi hna cu a tlaak hna caah tubantuk in an nunnak a liam hi a si, hi thil a can hi zaan ah a si. Kawl ralhraang nih hin zaan suimilam 11:00 PM hrawng in hmun an khuarnak Kyaukdaw khua in kah hram an thok tiah theih a si i tubantuk in Pihsi khuate ah a tlak hi a si.
Chungkhar pathum bomb nih a tlak i nunnak a liammi hna hi an pabik a min ah Soe Win, kum 45, an nu hi Tan Tan Wai a si i kum 44 a si ve cun an fanu te hi Phyu Phyu a si tiah theih a si anih hi kum 14 mino te a si i taang ruk a kai liomi a si, an i hngilh cuahmah lio ah tubantuk in bomb nih a tlaak hna i an nunnak a liam hi a si tiah tualchung media nih a langhter. An fapa hi Malaysia ah khua a sa tiah theih a si.
Khuapi Laak Kahdohnak Tuah Ding Ah PDF Timhcia An Si Cang-NUG: Ram chungah khuapi laak kahdohnak tuah ding in tlangcung hriamtlai hna le PDF ṭangṭi phu hna cu hmunkhat ah khua an khangṭi i, timhcia tein an um cang, tiah NUG President zung in chimphuannak nawlngeitu Kyaw Zin nih a chim tiah theih a si.
NUG nih a ra laimi 2023 thok cun SAC ralkap cu ramkhel leiin siseh, rallam in siseh, chawleh chawhrawlnak leiin siseh, cun vawleicung upadi ning in siseh, a lamkip in kan nam cang lai. Cu pinah rallam hmun 6 in kan luhhnawh cang lai, tiah a luancia October 7 ah cathanh an rak chuah. Khuapi laak kahdohnak kan tuah te tikah mizapi inn le lo hnursuan lo le mizapi humhim khawh ding in kan i zuam lai. Cheukhat khuapi ahcun PDF nih SAC ralkap an kulh cang hna, tiah NUG chimphuannak nawlngeitu Kyaw Zin nih a chim.
CDM ralbawi pakhat nih khuapi laak kahdohnak kan tuah khawh nakding ahcun vanral kan i runven khawh hnasa a hauh caah vanlawng i khamnak hi biatak tein kan i hmaithlak a hau, tiah chim. Vanral kan i runven khawh ahcun khuapi laak kahdohnak kan tuah lo hmanh ah tampi ṭhathnemnak a chuahpi lai. Vanlawng tilknak lam le van lei rianṭuannak zung hna kan kah khawh ahcun thil ṭha tuk a si lai, tiah a chim chap. SAC ralkap nih vanlawng hmang in bomb an thlak lengmang mi cungah NUG nih vanlawng kahnak hriamnam cu a hmun le caan aa remnak bik ah hman ding in kan tawlrel cuahmah, tiah an thanh.
SAC nih nawlngeihnak an lak hnu ah vanlawng hmang in voi 250 nak tlawm lo kahdohnak an tuah i, tualchung mi 200 leng an nunnak a liam, tiah NUG nih cathanh an chuah. Credit: The Chin Post
