Related Articles
November 3 zaanlei suimilam 4:00 PM (Indian Standard Time) hrawngah Electric Department rianttuan Pu Francis Rocungnunga (kum 30) cu Electric mei tha nih a tlaih ruangah a nunnak a liam tiah theih a si.
Hi Pu Francis Rocungnunga hi Mizoram, Lawngtlai, College sang i khuasami a si i November 3, zaanlei suimilam 4 hrawngah AOC sang ah Electric mei line a rawkmi remh/siam dingah electric tung a kai i a tuah cuahmah lio ah mei tha nih a tlaih hi a si. Pu Francis cu District Hospital (Lawngtlai peng Sizung) an phanhpi manh ko nain sibawi te nih an chanh manh khawh ti lo caah a nunnak a liam hi a si.
Pu Francis nih hin Electric tung a kai hlan ah control room lei ttuanvo ngeitu sinah ttha tein pehtlaihnak a tuah hmasa ko tiah Mizoram tualchung news nih an chim/ttial. Pu Francis hi mittha le Pathian aa bochan ngaimi a si i Lairam Isua Khrista Baptist Kohhran (LIKBK) Zion Unit ah Minobu hruaitu, Assistant Secretary rian a tlaih cuahmah lio a si tiah theih a si. Pu Francis nih hin a nupi le a fale pahnih (kum 2 mi le kum 1 mi) a tan tak hna. A ruak hi Lawngtlai AOC ah zaan varpi a si hnu ah a thaizing lei ah an khua, Cheural khua lei ah tlunpi dingin timhtuahnak an ngei tiah theih a si.
A cunglei kan rak langhtermi konghe pehtlai in Pu Francis Rocungnunga thihnak ah Lawngtlai mipi an chuak i mei lei rianttuantu hna an rian in chuah dingah an hal tiah theih a si. Lawngtlai mipi hna cu mei zung hmai ah duhlonak langhter in an chuak tiah Mizoram tualchung media nih a langhter. Mipi nih cun cozah ttuanvo ngeitu hna sinah a tanglei bantuk in halnak an tuah.
1. Mei tha nih a tlaih lio i duty a hngakmi hna an rian in chuah ding!
2. Power & Electricity Department, Lawngtlai Division i hotu sangbik cu fak piin dantatnak tuah ding!
3. Ngaihchiatnak a tongmi chungkhar sinah bawmhnak pek ding!
4. Ngaihchiatnak a tongmi chungkhar cu an tuan khawh tawk cozah rian pek ding!
