Related Articles
Mizo hlasakthiam Vanlalsailoa hi a thei/hngal lo kan um lai lo ti usihlaw kan palh lai lo dah, cutluk cun kanmah Chin (Lai) miphun huap zong nih theihmi le hngalhmi a si. Anih hi Love Song in Pathian hla lei ah a kalmi a si i Pathian bia in siseh hla in siseh mino tampi Pathian lei ah a tthihruaitu pakhat a si ve, a fawinak in chim a si ahcun Pathian nih a hman ngaimi minung pakhat a si ve.
Tutan ah van langhter ka duhmi le Chin mino hna zong nih i cawn ve usih/cawnawktlak zong a si tiah ka ruahmi le ka cu “ALL CHIN ZOFA TE” nih interview an tuahnak i a bialehmi hna hi a si. An biahalmi ah lehnak a tuahning zoh le ngaih tikah zeitluk in dah Pathian a ttihmi le hringtu nu le pa a upat hna ning a lang, pakhat a chimmi uar a um khun tukmi cu “Pathian na ramkauhnak ding ca le na rian hi tlamtling tein ka ttuankhawhnak hnga saupi kan tlanval piak lai tiah ka ti” a ti, hi bia ko nih hin thinlung a tongh ngaingai. Cucu Vanlalsailoa a nun hmanning he zohchih tikah tuahsernak in a langhter taktak ko ti kha hmuhkhawh a si.
ALL CHIN ZOFA TE nih interview an tuahnak ahcun tihin bia an halning cu a si “Hi ti thluahchuah na hmuhmi hi zeiruang bik ah dah a si hnga tihi na kan chim/ruah kho hnga maw, tiah an hal. Cucu hlasakthiam Vanlalsailoa nih tihin lehnak a tuah, a tawifiannak in ka rak ttial lai, a chimmi cu “Mi nih thluachuakmi tiin an ka hmuhning le kei zong nih a hlaan he tahchunh ahcun thluachuakmi ka si tiah kaa ti ngam vemi cu a pakhatnak bik ah ka nu le pa ka dawt hna ruangah hin a si ko, ka nu le ka pa harsa tuk i an um ding khi ka siang lo. An ngeihkhawh ko dingmi an ngeihkhawh lo nak cha cun ka duh tukmi ngeih lo zong kha poi ah ka chia lo, ka chimmi aa dawh lo ngai men lai nain ka nu le pa hi ka fale zoh in ka zoh hna” tiah a chim.
A peh rihmi cu “zeitluk in dah ka nu le pa nih hin an nun hi nuam ngai in le lungretheihnak um lo tein an hman lai tihi ka sikhawh tawk in kaa zuam pengmi le ka thinlung i ka chiah zungzalmi a si. Cu vialte cu ka sikhawh chungin tlamtlinh kaa tim i hi cancan ka tlanvalnak zong hi a si, nupi hna rak ngei tuanning le kaa timhmi vialte hi ka tlamtlinh lai tiah ka ruat lo, cu caah thluachuah zong hi ka hmuhnak a si lai tiah ka zumh i Bible chung i Efesa zongah kan hmuh khah” tiah a chim, hibantuk in bialehnak a tuah tikah Vanlalsailoa hi zeitluk in dah nu le pa upatmi le, nu le pa cungah dawtnak a ngeih ti hi hmuhkhawh colh a si.
A pahnihnak i bialehnak a tuah tthanmi cu tihin a si a cunglei i kan rak langhter hmasa cang bantuk khan “Pathian na rian hi hlawhtling in le nung tak in le zumhtlak tein le theipar ttha taktak a tlaikhawhnak hnga saupi kan tlanval piak lai tiah ka ti, hihi a hlaan piin biakamnak ka rak tuah cangmi kha a si i a tuhi ka zoh ko ulaw ka tlanvalnak hi a sau ngai ve ruangmang ko cang, cucu Pathian nih a theih i thluachuah zong tampi a ka peknak hi a si ko” tiah a chim. Cu caah hlasakthiam Vanlalsailoa nunning le nupi a ngeih aa hmanhmawh lo ning zoh tikah a biakam ah hin fek tein a dir peng timi hmuhkhawh a si.
Cun pathumnak a chimmi zong hi uar a um taktak, cucu zeitindah a chim tiah cun kan ruahnak hi a thianhlim awk a si cucu a biapi tuk tiah a chim, zirtiannak hi kan ngeih ding a si lo ti kha a si ko. “Ruah thianhlim hi a biapi taktakmi a si, zirtiannak a ngeimi minung nih hin Pathian thluachuah hi a hmu kho taktak lo. Micung ah zawnruahnak a ngeimi, a thli in mikong a ceih bal ve lomi, midang cungah zawnruahnak le dawtnak thinlung taktak he a tak in rian a ttuanmi hna hi Pathian nih thlua a chuah ko hna. Kei zong (Vanlalsailoa) ka chim ko lai chawva ah a rummi cu ka si lo nain Pathian thawngin ka sikhawh tawk in miharsa hi ka bawmh tawn ve, Mizoram mipi theih loin ka tuahmi thil tampi a um ve, cucu Pathian nih a hngalh dih cikcek ko. Cun ahohmanh hi mipi theih in an kong ka ceih bal lo hi zong hi Pathian thluachuah pakhat a si” tiah a chimmi tampi chungin a tawifiannak in ka rak langhter.
A cunglei konghe pehtlai in ka rak langhtermi, hlasakthiam Vanlalsailoa nih zeiruang bik ah dah Pathian thluachuah hi ka don tiah a zumhbikmi a chimmi hi thil ttha lawngte an si. Nu le pa upatnak nih thluachuah a phurh zia te hna, Pathian rian caah cun nupi ngeih lo zong poi ah a chiah lo nak te hna le thinlung thurhnawm a tthat lozia te hna a chimmi nih hin kan nih Chin mino tampi zong nun tharnak kan pe cio hram seh. Interview an tuahnak video cu ALL CHIN ZOFA TE facebook page in zohkhawh a si.
