Related Articles
Tial Cung Thang a sung ruangmang ne ai, Tutan an i thuat hi ONE Championship, Bantamweight ah a si i, an i thonghnak hmun hi Mall Of Asia Arena, Manila ah a si. Tutan hi Philippines ram mi Jeremy Pacatiw he an i thongh hi a si. Kan i ngaih tuk cio mi cu nihin hi a si ko hmanhsehlaw Tial Cung Thang cu round 2 nak ah submission in a sung ruangmang ai, Jeremy hi a rak thiam ve hrimhrim i mitlaih le ceh phunphai a rak thiam tuk ti a lang, Tial Thang zong Triangle (kut le hngawng ceh) in a tei kha a si. Vawlei a si tik ah teinak hmuh khawh peng a si lo, Tial Thang zong hitluk tiangtiang hmunhma a phanh khawh hi Lai miphun nih kan lawmhpi tuk awk a si. Thazaang tu pe chinchin ko hna usih.
Tial Thang Zaang aa thoknak hram tlawmpal van zoh tuah hna usih: Kan theih cio bantukin Lai patthawng Tial Thang Zaathang hi Kawlram chuakmi a si. Anih hi a ngakchiat tein Martial Arts ah hin a thinlung um ngaimi pa a si, cun Chin State Wrestling Champion zongah 4th tiangte Champion dirhmun ah a um cangmi patthawng pakhat a si. Mino te a si in United States ah khua a sa cangmi zong a si tiah ONE Championship nih a langhter.
Tial Thang Zaathang nih hin tang 7th a kai ah Wrestling team pakhat ah a rak lut, cu thok cun MMA lei ah organizations tampi nih theih hram aa thoknak zong a si. Sianginn a kai lio ah hin, New York State Championships i Freestyle and Greco-Toman Wrestling zongah voi 500 tiangte teinak a rak hmuh bal cang. Cun Brazilian Jiu-Jitsu zongah voi 50 tiangte teinak a rak co hoi tthan cang, kan Laipa ahcun patthawng taktak bak a si tikhawh a si. Cuticun professional in mixed martial arts ah hram a thoknak zong a si phah.
Kan theih cio bantuk in ONE Championship ah two-division in taisawmh a rak co balmi kanmah Kawlram miphun Aung La N Sang he an i ton hnu le amah sin ah training a laak hnu in ONE Championship tiang hmanhah a thongh/vuak hmuhkhawh a hong si cang. ONE Championship aa thonghnak ah hin voithum cu teinak a hmuh cang i voikhat belte fair lo ngai in sungh an rak pek, cucu mipi zong nih kan hmuh cio ko khah, a hnu bik aa thongh hi February 11, 2022 ah khan a si. Tutan zong aa thawng tthan zau cang lai caah Chin (Lai) miphun nih thazaang kan pek a herh taktak ko, Tial Thang bantuk Laipa an chuak rih lo ti usihlaw kan palh lai lo. Hmunhma saangbik tiang a phanh khawhnak hnga thlacam zongin bawm cio hna usih.
