Related Articles
December 15, 2022 zaan ah Kawlram in siseh vawleicung pumpi ah van in a zuangmi mei ceu bantuk a ngan taktakmi pakhat cu hmuh cio a si i hman zong zeimawzat nih an thlak, khakha Lai mi tampi cu kan thin a phaang i Aliens hlah maw an si hnga tiah ruahnak a ngeimi zong kan tam leen, kan mawh hrim lo zeicatiah kan fimthiamnak pei a tlawm tuk rih fom cu.
Zeidang si loin SpaceX nih NASA i ti lei hlathlaitu rocket pakhat an zuantermi a si tiah fehternak a um. Mirang nih cun Surface Water and Ocean Topography (SWOT) an ti i cucu satellite pakhat nih kan vawlei pumpi i ti (water) vialte zeitindah an sining timi tahnak/hlathlainak ah hmanmi satellite pakhat a si cucaah thinphaan ding zeihmanh a um lo. US caan in December 15 zinglei 6:45 a.m. hrawng ah khan an rak zuantermi kha a si i Kawlram um mi nih cun a zaan hrawngah kan rak hmuh ve ceio kha a si. Hi rocket an zuantermi hi a min Falcon 9 tiah an bunh. Asinain tlamtlin lonak a um caah Cawn ninga zinglei US caan ah thlah tthan an timh.
“SpaceX nih Falcon 9 (rocket min a si) cu rocket zuanternak hmun Space Launch Complex 4 East (SLC-4E), California i um Vandenberg Space Force Base ah zuanter a si hmanhsehlaw a phei lei in a zuang, cucu cunglei phu hna nih kan hlathlai tik ah seh (engines) pahnih ah hnawmtam kan hmuh” tiah NASA nih official tein statement zong an rak chuah cang. “Nihin ah ttha tein rocket nih a ngeihmi engines vialte zong zohfelnak kan tuah dih cun kan zuanter hlan deuh zongah ttha tein zohfelnak kan ngei tthan rih lai” tiah an chap chih. Cawn ninga i an i timhtuah ning cu a si nain thil hnawmtam an hmuh rih a si ahcun caan sau zong kan laak khawh tiah an langhter.
SWOT hi NASA domhtlaihnak le French space agency CNES in Canadian le U.K. space agencies hna he aa pehtlaihmi a si. Hi rocket (satellite) hi tlamtling tein an thlahkhawh a si ahcun hi nih hin vawlei pumpi tidil siseh tiva siseh rili siseh, an thuh/kauh ning a tah (measure) dih kho tu a si. Cu nih cun vawleicung thiamsangbik (scientists) hna zong ti kalning (waterways) lei ah theihhngalhnak tampi a chap hna lai pin ah hi nih zeitluk in dah kan nikhua thlennak ah rian a ttuan timi tampi theihhngalhnak a chap hna lai tiah mission lei phu hna nih an chimning a si. Source: space
