Related Articles
Chin mino dihlak kan hlawh a tlin khawh ve nak hnga tiah duhfaak ngai in Tuluk mirum pa Jack Ma nih a chim mi hi rak rel ve. Kum 24 na tlin hnu, kan hlawhtlinnak ca dingah zeibantuk thil hi dah ka kal taak awk a si tiah a chim mi hi ttha tein kan zulh a si ahcun mi roling ah aa chuah khomi Chin mino kan si.
1. Thil man faakmi kha kal taak khawh i zuam a herh hringhran, a bik in hnipuan fenhaih ah. A tulio chanthar minung hi kan i hruk-aih ning a hung saan ngaingai cucu mirang nih Fashion an hei ti ko. Cu tikah nang zong nih hnipuan chuak thar paohpaoh cawk na duh ve hmanhsehlaw na ngeihchiah chawva nih a tlinh ti lo, cucu mino caah cun a um awk thil a si ko. Asinain kum 24 na tlin cang tikah mi puitling si kho dingin na cawn a herh can, kal taak a herhmi kha na kal taak ngam a biapi tuk. Hnipuan na cawk lengmangnak phaisa kha i khon law cucu zeitindah ka karhter khawh lai ti kha tuak hram i thok cang. Mipi lakah hniphuan man tlawmmi te khan tlongleng ko law na rian tu kha felfai tein ttuan khawh i zuam koh. Thlakhat voikhat hniphuan naa cawk tawnmi kha thlahnih ah voikhat tibantuk in tthumhkhawh i zuam koh. Cuticun phaisa khonmi tampi na ngei kho lai.
2. Nangmah he aa tlak lomi asiloah nangmah he nan sining aa hrawm kho lomi nungak/tlangval kha kawp/duh hna hlah. Nangmah he na siining aa hrawm kho ve ttung lomi nungak/tlangval kha na tik cu caan paam lak in duh hna hlah. Na saduhthahmi nungak/tlangval kha catlap ah ttial ko law cuticun an siining zohchih in na nun cu hmang koh. Lungawttawm le thinlung nuam lo ngai in le midang hmaikhap lo ruang le kum upat cang ruang i nupi/pasal ka tongsual lai lo ti phaan ruangah a mikip kha va duh an herh lem lo. Cu nih cun na lung in buaiter hlah seh, a herh ahcun Single zong in um koh, a caan phaak tikah cun na caah a ttha bik dingmi nupi/pasal cu naa hmuh hrimhrim te ko lai.
3. Midang nih zeitindah an ka hmuhning a si hnga timi ruahnak kha kal taak i tim cangh. Mi nih upatmi maw ka si hnga asilaoh nemnehmi dah ka si tibantuk ruahnak hi minung kan nunnak ah a kan buaiter ngaingaimi ruahnak pakhat a si sihmanhsehlaw khakha a biapi bak lo a biapimi cu midang hmuhning si loin nangmah le nangmah naa hmuhning tu kha a biapi deuh tuk. Mi nih upat duh ruang i na sii loning in na nun na hman tuk a si ahcun na hlawhtlinnak lam kha naa phih chinchin nak tu a si deuh. Cunak cun nangmah tein puitlinnak lamlei kha zul ko law midang nih zeitindah an ka hmuhning a si hnga timi ruat lo tein na mit chinh taak ko hna law na hlawhtlin hnu, na duh le duh lo zongah upatmi na si tthiamtthiam ko lai.
4. Hringtu nu le pa mawhphurhnak kha kaal taak i zuam cangh. Ka nu le pa an si a fah caah hawi zong kan tluk kho hna lo tibantuk le midang bantuk in nu le pa nih a kenkip ah duhdim tein a chia khomi ngei ve ning law ka hlawhtling hrimhrim ve ko lai tiin na nu le pa chanbaunak kha mawhphurh hna hlah. Cunak cun ka nu le pa an si a fah caah kei cu hawidang nak in kaa zuam deuh a herh timi lungput kha ngeih khawh tu i zuam, an hringtu na nu le pa nak in nangmah kha na biapi deuh dawhawh.
5. Phaisa hmuh a har tuk tibantuk phunzainak kha kal taak khawh i zuam. Phaisa na hmuhmi a tlawm tuk ruangah phunzai loin zeitindah ka karhter khawhning a si lai titu kha kawl khawh i zuam deuh. Mifim le thiamsaang hna nih training an tuah tawnmi kip ah kai khawh i zuam tawn, cuticun nangmah thiamnak he khan na phaisa cun hramthok i zuam law zeitik ni maw ahcun hlawhtlin nak silaoh rianttha cu na hmuh hrimhrim te ko lai.
6. A mikip caah lawmhnak tuah i timh kha kal taak cangh. Midang ca i tthathnemtuah/lawmhnak tuah hi a ttha tukmi cu a si ko hmanhsehlaw nangmah kha pakhatnak ah naa chiah a hau. Rian na ttuan cuahmah lio ah mi pakhat khat nih thil dang tuah dingin bawmh an hal tikah lungawttawmnak ngei hrimhrim hlah el/al ngamnak thinlung kha ngeih khawh i zuam koh. A mikip ca i rianttuan/bawmh hi na ttuanvo nganbik a si lem lo ti kha philh lo ding.
7. Internet/Social Media hman hi uar tuk hlah kal taak khawh i zuam. A tulio chanthar ah social media hman lo cu chuahchan ngei lo tluk khi a si, cucu a dik lo kan ti kho hrimhrim lo, hman awk a si ko. Asinain na tthanchonak le na rianttuannak ah buaitertu tiang siter dingin hmang tuk hlah. Minutes 15 hrawng na van online khin cun i zaa koh, na caan kha a herh lo ah na paamter tuk.
8. Ngandamnak zei ah rel lo tibantuk kha kal taak khawh i zuam. Kum 24 hi kum laklawh taktak a si tikah kan ngandamnak hi a biapi ah kan chiah ding taktak a si. Zaan ih caan, zing thawh caan le rawl ei caan tibantuk hna hi kan taksa nih a duhning in kan tuahpiak awk hrimhrim a si. Ngandamnak caah hin ei le din zong hi a biapi taktakmi a si. Na ngandam lo a si ahcun rian hraang zong na ttuan kho lai lo. Cu caah ngandamnak kha biapi ngai ah na chiah a herh.
9. Duh paoh in tlonleen kha kal taak khawh i zuam. Zei thil na tuahnak hmanh ah a cintawk/zatawk tein tuah i zuam tawn. Rianttuan i thawh i phaisa bawm kawl zungzal asiloah mawtaw cycle tawh kawl zungzal tibantuk kha na tthinh hrimhrim a herh. A hlan kan tein na herh dingmi thilri hna cu timhcia tein na chiah awk an si.
