Related Articles
Vancung In Ceunak A Zuangmi Cu India Nih Missile Hneksaknak An Tuahmi A Si: Kawlram hmun tam ngai ah nizan December 15 zan sml 7:00 hrawngah hmuh khawh a simi ceu pakhat cu India ram nih Angni V Nuclear a phor khotu, khan tampi tiang a zuang khomi missile hneksaknak kan tuahmi a si i hlawhtlinnak kan hmu, tiah India ram runvennak zung nih thanhmi cherhchan in India media tampi nih an ṭial, tiah theih a si.
Kilometer 5,400 leng ah hmuitinh a kheng kho i Angni V Nuclear a phor khotu hriamngan missile cu, nizan December 15 zanlei sml 5:30 in Odisha um AP2 Abdul Kalam tikulh ah India nih tlamtling tein hneksaknak an tuah i an hlawhtling tiah theih a si. Atu bantukin hneksaknak kan tuahmi hi a hlannak in missile lei thiamnak thar le seh thilri thar hman thiamnak caah kan hneksaknak a si, tiah an langhter. India nih 2021 October ah Angni V Nuclear phor khotu missile hneksaknak an rak tuah i, a hmuitinhmi zong dik tein a khen khawh. Missile cu a san meter 17 a si i 1.5 ton a ritmi a phor khotu a si, tiah theih a si.
India le Tuluk cu ramri kongah a buaibai ngaingaimi an si i ralhriam lei zong in aa zuam ngaingaimi an si. India nih missile hneksaknak an tuahmi hi India le Tuluk karah i hmuh thiam lonak fak piin a chuak kho tiah tuaktantu hna nih an chim.
SAC Ralkap Nih An Khanghmi Nanchaung Khua Ah Mi Ruak Pakhat An Hmuh: Sagaing ramṭhen, Kalaymyo peng Nanchaung khua ah SAC ralkap nih rallam an sial i, inn an khangh pinah mi ruak pakhat zong kan hmuh tiah Hyenas Survey Crops nih December 15 ah cathanh an chuah. SAC ralkap nih December 12 ah Kyawngtaik(ကျောင်းတိုက်), Setaw U lei in Nanchaung khua lei ah 50 hrawng nih rallam an sial i inn an rak khangh, tiah theih a si.
December 13 ah SAC ralkap 30 hrawng thazaang an chap caah Nanchaung khua cu an khangh ṭhan i, zanlei sml 5:00 hrawngah PDF ṭangṭi phu he kahdohnak a chuak, tiah theih a si. December 14 ah PDF ṭangṭi phu cu Nanchaung khua ah an lut i, SAC ralkap pawl cu hnu an kir i, PDF ṭangṭi phu nih hmunhma thianhhlimnak an tuah lioah SAC ralkap nih khuami inn an rak bauhpiakmi hna le an thah i mei in an rak khanghmi ruak pakhat zong an hmuh, tiah theih a si. Credit: The Chin Post
