Related Articles
2023 Kum Hi “Chin Nation- Building” Caah A Biapi Tukmi Kum A Si: CJDC Chairman, 2023 kum hi Chin miphun kan caah le Chin Nation Building caah biapi tuk mi kum a si lai tiah Chinland Joint Defence Committee (CJDC)Chairman nih a chim.
CJDC Chairman Salai Thla Hre nih January 1, 2023 Kumthar kuttlaih cakuat ah “2023 cu “Chin Nation – Building Kum” timi tlangtar he Chin miphun nih kan dohthlennak țhawngchin in kan pehzulh lai” tiah a ti. Cucaah hi dohthlennak ah Chin miphun dihlak nih mah peng le tlang lawng dirpi nak kha lonh in Chin Miphun timi pakhat ah kan i funtom khawhnak hnga zong kan i zuam cio a hau tiah a chim chih.
Atu bantuk a biapi tukmi caan lio ah hmunkip a ummi Chin Zatlang Bu vialte hna i țuanvo ngeitu, Biaknak lei hruaitu hna zong nih Chin miphun kan dohthlennak ah Miphun țhanghphawhnak a chuahnak hnga a lamkip nan kan bawmh cio a herh tiah a chim chap. Cun, 2022 chung ah Chin Miphun dohthlennak ah aa tel mi CJDC ralkap dihlak le CJDC chungtel phu kip sin ah mah le tikhawh tawk cio in bawmchantu dihlak upatnak sangbik kan pek hna, hmailei zong ah tam chinchin in bawmhnak pek rih ding in kan nawl hna tiah CJDC Chairman Salai Thla Hre nih a ti.
Chinland Joint Defense Committee (CJDC) cu CNF/CNA tel in Pau dohthlennak a tuahtu Chinland ralkap bu hna an i funtomnak a si i Ralkap bu 18 an i telnak bu a si.
Mindat Peng Ah SAC Ralkap Nih Tualchung Mi 3 An Thah Hna: Chin ramkulh, Mindat nitlak lei meng 5 aa hlatnak sianghleirun pawng ah ral vengtu SAC ralkap hna nih tualchung mi 3 an tlaih hna i an thah mi hna ruak cu an chungkhar nih an hmuh tiah theih a si. A luancia December 27, ah Mindat hrambunh khah-lah-yiah 274 battalion in SAC ralkap hna cu ral an ven lio ah tualchung mi 3 cu an tlai hna. Cu hnu ah tlaih a tongmi 3 chung in pahnih ruak cu an hmuh i pakhat ruak cu nihin tiang ah hmuh a si rihlo tiah Mindat khuami pakhat nih a chim.
“Khua pawng ral an ven lio ah tualchung mi cu an tlaih hna, meng 9 ah an tlaih hna hnu ah meng 4 ah an ruak cu hmuh an si. Minung 2 ruak cu an chungkhar nih an hmuh cang hna na in, pakhat ruak cu hmuh a si rihlo” tiah a chim. SAC ralkap kut in tlaih le thah a tong mi 3 hi Lungkha, Thangyoe le Nangi khuami hna an si tiah theih a si. Mindat khuachung hrambunh battalion 274 in SAC ralkap hna cu thazaang i chap in, nitin lam cung ah checkhlatnak le bia halnak an tuah tiah theih a si.
SAC ralkap kuttang um Telegram Channel hna nih cun Mindat peng Pan-aw khua pawng ah tualchung hriamtlai phu hna he kaphnih kar kahdohnak a chuah hnu ah, tualchung hriamtlai phu lei in nunnak liammi an um leng ah kut ser meithal zong kan lak tiah an langhter. Tutan ah Mindat tualchung mi 3 thah an tonnak kong he pehtlai in CDF Mindat nih cathanh an chuahmi a um rih lo. Credit: The Chin Post
