Related Articles
Hibantuk thil hi a cang pengmi thil a si lem lo, nu le va zong nih an ton pengmi thil zong a si fawn lo. USA ramchung khua pakhat ah nuva hna nih faphir an ngeih hna, asinain fa an ngeihmi hna cu phir an si ko bu ah an chuah kum aa khat lo.
USA ramchung Denton, Texas ah khua a sami Kali Jo Scott, kum 37 minung cu January 11 hi caesarean section in nau ngei dingah timhlamhnak a rak ngei, kum 2023 ah hin a fale phir hna cu ngeih dingah an rak i zumh. Fa ngei ding i an rak i timhmi nak tuan December 29 ah siizung an kal i cu ah cun thisen zohfelnak ngeih dingin Doctor te nih an rak admit diam hna ti a si.
Siizung ahcun sau zong an um manh lo, December 31 zaan suimilam 11:55 pm bak ah phir hna lak ah upa deuh Annie Jo cu a ngeih, minute 5 hnu tlawmpal ah phir pakhat cu zaan suimilam 12:01 AM, January 1 ah Effie Rose cu a hung chuak ve. An chuah caan hi aa naih ngai ko nain pakhat deuh hi kum 2022 ah a chuak i pakhat deuh hi kum 2023 ah a hung chuak ve, phir an sinain an chuah kum aa dannak cu a si.
Hibantuk thil hi vawleicung hmun tthenkhat ah kum chiar a cang tawn tiah theih a si, asinain minung tam an si lo i minung tlawm te nih ton tawnmi a si. Hringtu an nu Kali Jo Scott nih cun Good Morning America ah hitihin bia a chim “minung tampi nih an ton bal lomi van ton cu a nuamh ning aa dang ngaingai, hi faphir ka ngeihmi hna zong hi tthat lei panh in an tthancho khawhnak hnga zong zumhnak tampi ka ngei” tiah a chim.
A luancia kum 1 lio zong ah khan Kali nih a tonmi thil hi Salinas, California ah khuasa Fatima Madrigal zong nih a rak ton bal ve cang. Nu faphir a rak ngeih ve hna i kum 2021 le kum 2022 ah a rak chuak vemi an si, an rak i dannak hi minute 15 lawng a si tiah theih a si.
