Related Articles
CNDF Sniper aa tlaihmi Bible Hruaia hi Mizoram ah a chuakmi a si. Mizoram chuakmi asinain tubantuk SAC ralhraang nih nawlngeihnak an laak tikah CNDF ah a luh hi a si. A nu le pa hi cu Kawlram chuak an si i hringtu a pa nih miphun le ram caah hriamtlaih kong a chim lengmang tikah tubantuk in Bible Hruaia zong nih “ka pa duhmi ka tlinter tiah kaa ruah” tiin a chim.
Kan biak Pathian nih zeitluk in dah lam a hruai hna timi kong a chim tikah Pathian sin lawmh lo awk a ttha lo, a ti mi cu “Kahdohnak ah kan thil tonmi tete chim ahcun chim ding tamtuk a um, Pathian hi a ttha hringhran ko. Voikhat kan i kah lio le bang cu ka ke pawng bak ah RPG a rak tla nain a puak lo, a thar bak asinain a puak lo. Voikhat zong Laitlang ah ralhraang he cun kan i kap hna i minung 17 hrawng lawng kan si, kan dirhmun a tthat lo caah kan zaam. Ramtang bur lak bak ah a si i khua nih le a mui cang, ka hmai i a kalpi ka hawipa bag a rang (var) lawng bak ka hmuh khawh. Cuti hnabeidong ngai i kan um lio ahcun Damde (a tawka ceumi) tam ngai khi an hung zuang cu nih cun lam an kan hruai, Suimilam pakhat chung paoh cu an kan hruai lai cuticun lampi tiang kan phan kho. A sunglawi tuk hringhran ka ti i Pathian zong ka thangtthat” tiin Rihli Voice Youtube Channel ahcun a chim.
Zeitluk in dah an intuar ning tibantuk a chim mi ngaih tik ah zaangfak ngaingai an si, a chim tthan mi cu “Ka ralkap min hi Bible Hruaia a si i CNDF TZ camp ah Sniper tlaitu ka si. Kum 2021 May 30 ah khan Mizoram in Kawlram ah ka lut i a hramthok ahcun CR bantuk in ka um. A donghnak ahcun CNDF ah ka lut. A hlan ahcun Sianginn cachim saya pakhat ka si ve i ka pa saduhthah bang in mipi ralkap ah hin ka luh hi a si. ka nu le pa hi Kawlram chuak an sinain kei tu cu Mizoram ah a chuakmi ka si, ka pa nih hin ram le miphun caah ralhraang pawl doh hi a chim lengmang, cu caah ka pa aiawh ah keimah ka kal hi a si bik ko” tiah a chim.
A peh tthan rihmi cu “Ralhraang he kan i dohnak ah a har ka timi cu suimilam 7 chung ke bak in kan kal tawn hi a si, suimilam 4 chung ti lo bak in kan um. Lamkam ah hin tiva te a hnawm ngaimi hi kan hmuh i cucu kan thilpuan in kan thianh lengmang len nain a ngah lo caah kan hawipa bawngbi chungnawh bak in ti cu kan thianh. Cu ti van din ko cu a har ka ti ngaingai. Meithal kuan 60 hrawng lawngin ralhraang doh a si tikah a fawi bak lo. A caan ahcun Mizoram hna i kir mei hna hi ka duh caan a tam. Asinain a tu ahcun ka van um sau deuhdeuh tikah mipi ralkap hna hi ka chuahtaak siang ti hna lo, thinlung dihlak in kaa pek lawlaw hi a si” tiah a chim.
Zeitluk in dah an tuar i zeitluk in dah a caan caan ahcun an hnabei a dongh timi cu fiang tein hngalh khawh a si. Chungkhar rual he nuam thlaimai tein um khawh an si ko lio caan zongah ram le miphun caah tiin hriamtlaih tu an i thim deuh, minung tampi nunnak tiang an pek cang cu mu, an caah thazaang biatak tein chuah rih ko hna usih, chawva lei ti khomi nih chawva ah, a lamkip in bawmchan ko hna usih.
