Related Articles
Falam Khua Chung Kahdohnak Kongah CNO Nih CNA Cu CJDC Zulhphung Zul Loin Kahdohnak An Tuah Tiah Cathanh An Chuah: January 18 zanlei sml 3:00 hrawngah Falam khua chung um SAC ralkap pawl cu, CNA nih an kah hna caah palik 1 a thi i 4 hliamhma an pu. Cu kong he pehtlai in Chin National Organization(CNO) nih a tanglei bantukin cathanh an chuah.
Cu kahdohnak ah CNO/CNDF he pehtlaihnak kan ngei lo. Falam khua chung kahdohnak a si caah Falam peng he aa pehtlaimi hriamtlai theihternak an kan tuah lomi hi CJDC nih zulh phung sermi an buar, tiah CNO nih cun an langhter. Falam peng chungah CNO/CNDF nih nawlpeknak a silole ceihkhannak um loin kahdohnak an tuahmi cu kan cohlang hrimhrim lo. Hi hnuah atu bantukin theihternak an kan tuah lo i kahdohnak an tuah rih ahcun a herh ningin dantatnak kan tuah hna lai, tiah an langhter.
Cu pinah kahdohnak he pehtlaihnak um loin kumtlinglo ngakchia hna telh in tualchung mi a tlaitu SAC kuttang mi hna zong fak piin kan doh hna. Nan tlaihmi hna a rannak in chuah ṭhan ding le nan chuah ṭhan hna lo ahcun CNO/CNDF nih fak piin lehrulhnak kan in tuah hna lai, tiah cathanh an chuah.
Ukraine Thawngpang Relchap: Helicopter A Tlak Ruangah Ukraine Cozah Minister Pakhat Le Ngakchia Hna Telh In Minung 18 Nak Tlawm Lo An Nunnak A Liam: Ukraine ram ah Helicopter pakhat cu tualleng sianginn kam ah a tlak caah cozah chungtel minister pakhat le ngakchia hna telh in minung 18 nak tlawm lo an thi, tiah theih a si. Kiev khuapi nichuahlei sang hmun pakhat ah Minister of the Interior, Dennis Monestsky le a dang minung 8 an i citmi Helicopter a tla i, minung 18 an nunnak a liam. Cu chungah ngakchia 3 nak tlawm lo an i tel. Minung 15 hrawng sii-inn ah an kalpi hna, tiah theih a si.
Helicopter cu Brewery sang pawngah a tla i Minister, Deputy Minister le Foreign Minister zung in officer pakhat an nunnak a liam. Helicopter cu Ukraine ram bawmhchanhnak zung nih an ngeihmi a si, tiah Ukraine palik bawi zik nih Facebook ah a tar. Atu tiang ah minung 18 an nunnak a liam i, 29 hliamhma an pu, tiah checkhlatnak lei ṭuanvo latu Oleksii Kuliba nih a chim. Helicopter a tlak hnu in tualleng sianginn kam ah mei kanghnak a chuak i zung rianṭuantu hna le ngakchia hna cu kaadang hmun ah kan ṭhial hna, tiah a chim chap.
Hmanthlak chung ning in a kangmi inn pakhat kam ah Helicopter a rawhnak pelpawi zong hmuh khawh a si. Zei ruang ah dah Helicopter hi a tlak ti cu fiang in hngalh a si lo nain Helicopter a tlak lio ah hin chum a zaam tuk. Helicopter a tlaknak a ruang zong nawlngeitu hna nih checkhlatnak an tuah cuahmah, tiah theih a si. Credit: The Chin Post
