Related Articles
Hibantuk thawngpang theih hi cu lung a faak hringhran tawn ko. Ram le miphun caah minung zeizat ko nih hin dah nunnak hi an pek cang hnga, an tlawm hrimhrim ti lo. Tutan zong SAC ralhraang nih tualchung hriamtlai phu karlak kahdohnak ah tualchung hriamtlai phu minung panga nih an nunnak an pek tthan.
Nizaan January 26 i a cangmi a si, hi kahdohnak hi Kawlram chung Sagaing ramtthen Wetlet township ah a si i zinglei hrawnghrang ah hi kahdohnak hi chuak sehlaw a lo. Wetlet hrawnghrang hi tualchung hriamtlai phu an tamnak hmun pakhat a si ve. Hi kahdohnak ahcun Tualchung hriamtlai phu (People Defence Force) lei in minung panga nih ram le miphun caah an nunnak an pek i hriamnam zeimawzat zong SAC ralhraang nih an laakpiak hna tiah Chindwin nih a langhter.
Hi kahdohnak hi Wetlet township, Moekyi khuate pakhat ah a si tiah theih a si i SAC ralhraang nih hin an luhhnawh hna tiah theih a si. Ralkap panga an thahkhawh hna pin ah hriamnam zong an laakchih. Chindwin i a langhterning ahcun tualchung hriamtlai phu chung ah hin spy (sungtthoh) um sehlaw cucu kan zumh tiah a langhter. SAC ralhraang nih hin PDF pawl umnak hi an theihkhawhnak ding lam a tlawm tiah an chim.
Tualchung hriamtlai phu umnak zawn bak an theihkhawh ning hi dalaan si loah spy cu an um hrimhrim lai tiah zumh a si, zeicatiah SAC ralhraang nih hin a tu an umnak hi an theihkhawhnak ding lam pakhat hmanh a um lo tiah an langhter. Zeicatiah hi PDF base camp chung i aa tel lomi, khua a sa ve lomi nih cun a zeitihmanh in ralhraang an luhkhawhnak ding lam a um lo tiah Chindwin News Agency nih cun a langhter.
