Related Articles
Cristiano Ronaldo hi UEFA Champions League 2023/24 ah aa celh kho te lai maw? Ballon d’Or zong voi nga tiangte a co cangmi le minthang Cristiano Ronaldo cu vawleicung pumpululh aa celhmi lak ah hlawh tambik ngei ding in Saudi Arabia lei club a simi Al-Nassr nih cun an cawk cang.
Manchester United player hlun a simi Ronaldo hi Saudi Pro League i aa thial tik ah UEFA Champions League zuamcawhnak ah i tel tthan ding cun lam a tlawm cang, a um ti lo tikhawh a si. Sihmanhsehlaw report tampi nih thawng an langhter ning ahcun Cristiano Ronaldo hi kum vui (next season) Champions League ah hmuhkhawh tthan a si nak cu an rak langhter cio.
Kum 37 a si cangmi Ronaldo le Al-Nassr hi June 2025 tiang rianttuantti ding in hnatlaknak an ngei cang i $208 hlawh ding in fehternak zong tuah a si. Hi chung ah $75 million cu club hlawh kelte a si lai i $134 million belte hi cu fakthanh a tuah dingmi ah siseh hmanthlaknak tibantuk a tuah dingmi in a hlawh dingmi a si, Ronaldo cu player dang bantuk a si lo tik ah a angki (jersey) man tibantuk ah hin phaisa tampi Club nih an rak hmuh tthan lengmang cu caah fakthanh le a dangdang ah a hlawh a tam khunnak zong hi a si.
Media ngan a simi Marca nih cun hitihin a langhter, Portugal ram caah captain a simi Ronaldo cu Al-Nassr he hnatlaknak an tuahmi ah hin Premier League lei club a simi Newcastle United ah i celh khawhnak nawl/phung hnatlaknak an tuah chih tiah theih a si. Newcastle United hi Saudi Arabia ram Public Investment Fund nih ngeihmi club a si i Ronaldo zong Al-Nassr he hnatlaknak an tuah tik ah Newcastle hi kum vui Champions League i an qualify a si ahcun Cristiano Ronaldo hi loan in Newcastle ah celhnak nawl a ngei. A tutiang EPL dirhmun ah Newcastle hi EPL ah pathumnak ah an um, kum vui UCL caah ruahchannak tampi a um tinak a si.
Real Madrid le Juventus player hlun a simi Ronaldo hi Champions League ah 138 aa celh cang i cu chung ahcun 140 goals a ngei cu nih cun UCL ah goal tambik ngei dirhmun ah a um, a changtu ah hin a Lionel Messi hi a si, anih hi 161 aa celhmi chung ah 129 tiang goal a ngei ve. Robert Lewandowski le Karim Benzema hi pathumnak le palinak ah an um i goal 91 le 86 an ngei ve.
Cristiano Ronaldo le Manchester United cu kan hnung November thla ah khan an i tthen ruangmang cang, Ronaldo zong nih a chuah hlan deuh vak ah a lung i aa uam mi vialte cu Piers Morgan nih interview a tuahnak ah a chim dih i cu caan tlawmpal ahcun tubantuk in Man Utd he an i tthen hi a si. Cu le cangka cun Ronaldo zong free agent in a um i Champions League club i aa telmi he rianttuantti dingin club aa hmuh ti lo caah Al-Nassr he hnatlaknak an tuah hi a si tiah thawngpang tampi nih cun a langhter.
