Related Articles
Matupi Peng Ngalai Khua Ah SAC Ralhrang Nih Minung 6 An Thah Hna: Chin ramkulh, Matupi Peng Ngalai khua ah SAC ralhrang hna an lut i khuami zong an thah hna. An thahmi hna chung ah minung pahnih cu Pu Van Bik le Pu Lap Lian an si i a dang ruak 4 cu a ho an si hngalh a si rih lo tiah khuami hna nih an chim.
Tangkhawng 15 ah SAC ralhrang hna cu 2023 thimnak caah min cazin kan la lai an ti i Matupi peng Ngalai khua ah an lut. Minung umnak inn 2 an khangh, khuami Pu Van Bik le Pu Lak Lian cu an tlaih hna i an thah hna. Cun ho si ti theih rih lo mi ralhrang hna nih thahmi miruak 4 zong hmuh an si tiah theih a si. “SAC ralhrang nih khuami pahnih cu an thah hna i pakhat ruak cu inn chung ah an chiah i an khangh chih. Cun a dang ruak khat cu Ngalai khua thlanmual ah an hlonh. SAC ralhrang hna thahmi ruak 4 zong hmuh chap an si.
An ruak hna cu mei in an khangh hna ca ah tualchung mi ruak ma a si anmah ralhrang a thimi mei in an khanghmi hna dah a si ti theih khawh a si rih lo” tiah khuami pakhat nih a chim. SAC ralhrang hna nih Ngalai khua Biakinn pahnih i thilri pawl zong pakhat hmanh tang lo in an lak. Cun minung umnak inn i a chung thilri zong an lak dih hnu ah Budozar in an hrawh hna i inn tung pawl zong an i lak hna tiah theih a si. Credit: CCNC
Cawbuk Check Gate Hngak SAC Ralkap Nih Khualtlawng Mi Hna Cu Duh Paoh In Khual Nan Tlawng Kho Ti Lai Lo An Ti Hna: Chin ramkulh, Khualipi Hakha Cawbuk sang um check gate hngaktu SAC ralkap le palik nih, khualtlawng mi hna cu hi hnu cun duh paoh in khual nan tlawng kho ti lai lo an ti hna, tiah theih a si. Khualtlawng mi pakhat nih, “Hi hnu khual na tlawn ahcun khua bawi le sang bawi nih khual na tlawn nakding theihpinak misen an thutmi catlap naa ken lawnglawng ah khual na tlawng kho lai. Cuti theihpinak misen an thutmi naa ken lo ahcun kan in kirter lai, an ka ti,” tiah The Chin Post ah a chim.
Hakha in khuate a kalmi an si ahcun sang bawi theihpinak catlap i ken a hau. Kir lei zong ah khualtlawnnak khua bawi theihpinak catlap i ken ṭhan a hau. SAC ralkap le palik nih January 20,21 le 22 ah khualtlawng mi hna cu an chimh dih hna, tiah theih a si. Khuate ummi pakhat nih khualtlawn tikah khua bawi theihpinak misen thutmi catlap i ken a hauh cang tikah khuate tampi ah khua bawi zong an um ti lo. Khua bawi an um ti lo cun khual tlawn khawh dawh lo phun khi a si cang, tiah a chim.
Khual nan tlawn duh a si cun khua bawi le sang bawi nih theihpinak misen an thutmi catlap i ken lawng a za lo. NRC number, cycle(motor) number le phone number tiang zong by heart nan zah dih a hau lai, tiah SAC ralkap le palik nih cun khualtlawng mi hna cu an chimh hna, tiah theih a si.
