Related Articles
Mindat Peng Khuate Ah SAC Ralhrang Hna Nih Jet Fighter Hmang In Bomb Voi 4 An Thlak Ṭhan: Nihin Tangkhawng 23 zinglei suimilam 11:00(Kawlram caan) hrawng ah SAC ralhrang hna nih Jet Fighter hmang in Mindat peng Paleihhtwe(ပလိပ်ထွီ) khua ah bomb voi 4 a thlak ṭhan tiah theih a si.
“Tuzing suimilam 11:30 hrawng ah Jet Fighter pahnih in bomb a thlak. Minung 3 hliam an tuar. An hma a fak ngai. Khuami dihlak in ramtang ah i thuh dih a si” tiah khuami pakhat nih a chim. Jet Fighter nih bomb a thlak dih hnu chun suimilam 12:10PM(Kawlram caan) hrawng ah Mindat khua hrambunh battalion 274 nih hriamngan voi 5 nak tlawm lo an kah.
An bomh cu Lohshe(လုပ်ရှဲ) khua ah a tla i a rawkmi le hliam a tuarmi an um le um lo theih a si rih lo.
2023 Tangkhawng thla chung lawng ah Mindat peng chung ah kahdohnak um lo in SAC ralhrang hna nih Vanlawng voi 8 tiang a hman cang i nichiar in hriamngan zong an kah peng tiah theih a si.
Matupi Peng Ngalai Khua Ah SAC Ralhrang Nih Minung 6 An Thah Hna: Chin ramkulh, Matupi Peng Ngalai khua ah SAC ralhrang hna an lut i khuami zong an thah hna. An thahmi hna chung ah minung pahnih cu Pu Van Bik le Pu Lap Lian an si i a dang ruak 4 cu a ho an si hngalh a si rih lo tiah khuami hna nih an chim. Tangkhawng 15 ah SAC ralhrang hna cu 2023 thimnak caah min cazin kan la lai an ti i Matupi peng Ngalai khua ah an lut.
Minung umnak inn 2 an khangh, khuami Pu Van Bik le Pu Lak Lian cu an tlaih hna i an thah hna. Cun ho si ti theih rih lo mi ralhrang hna nih thahmi miruak 4 zong hmuh an si tiah theih a si. “SAC ralhrang nih khuami pahnih cu an thah hna i pakhat ruak cu inn chung ah an chiah i an khangh chih. Cun a dang ruak khat cu Ngalai khua thlanmual ah an hlonh. SAC ralhrang hna thahmi ruak 4 zong hmuh chap an si. An ruak hna cu mei in an khangh hna ca ah tualchung mi ruak ma a si anmah ralhrang a thimi mei in an khanghmi hna dah a si ti theih khawh a si rih lo” tiah khuami pakhat nih a chim.
SAC ralhrang hna nih Ngalai khua Biakinn pahnih i thilri pawl zong pakhat hmanh tang lo in an lak. Cun minung umnak inn i a chung thilri zong an lak dih hnu ah Budozar in an hrawh hna i inn tung pawl zong an i lak hna tiah theih a si.
