Related Articles
Breakingnews: Nepal ah vanlawng a puak, tutiang thawngpang theih ning ahcun minung 68 nunnak a liam cang i hi nak zong hin nunnak a liam mi hi an tam kho tiah media ngan nih a langhter.
Hi thil cangmi hi nizaan January 15 Sunday (India caan) ah a cangmi thil a si i ramchung vanlawng Yeti Airlines hi accident a tongmi cu a si, accident a tonnak hmun hi Pokhara khuapi Nepal ram ah a si i hi tuksapur thil cangmi hi kum 30 chung ah Nepal ramchung vanlawng accident tonmi ah ttihnung bik le thihlohnak a tambik a si lai tiah an chim.
Hi vanlawng nih hin minung 72 a phurh hna tiah theih a si i michanhtu zaa renglo nih minung an kawl cuahmah lio a si, tlang lei ah accident an tonnak hmun hi a si tik ah milu kawl zong an i harh ngaingai tiah theih a si i cunglei nawlngeitu hna nih nikhat chung (sunday) cu milu kawlnak ah caan kan hmang i thaizing kip lei tiang zong milu kawl cu kan pehzulh tthan rih lai tiah cunglei nawl ngeitu nih cun an chim.
Local TV tthenkhat hna nih michanhtu an cawlcangh lio le milu an kawl lio hna cu video clip tawi tein an rak thlahmi tete hmuhkhawh a si i, vanlawng a puah tik ah khua le vai zong a tam hringhran. Khuacaan (weather) zong a tthat ko caah zeiruang bik ah dah hi vanlawng hi accident a ton timi biafiang theih a si rih lo.
Nepal ram hi vanlawng accident tete a tam ngai, tutan hi kum 30 chung ah an voikhat ton tthannak a si. Kum 1992 lio tan zong ah khan, Aviation Safety Network database nih a langhter ning ahcun, Pakistan International Airlines Airbus A300 cu Kathmandu khuapi fuhpanh ding in a zuan cuahmah lio ah tlang aa suk sual, cu ahcun minung 167 an rak thi. Cun kum 2000 lio tan zongah khan khuacaan aa thlen thut ruang ah accident an rak tong tthan i minung 350 an rak thi tthan.
Nepal vanlawng konghe pehtlai in European Union hna nih cun Nepal ram ah airlines zuang ti lo ding in kum 2013 ah khan a rak phih cang, cu zong cu accident konghe pehtlai in a si. Tutan accident konghe pehtlai in Yeti Airlines hi Nepal, Pokhara airport in Seti Gorge ah suimilam 10:50 a.m. ah zuan hram aa thok, Civil Aviation Authority nih statement an chuahning ahcun ” Zuan hram aa thok le tlawmpal ah accident a ton colh hi a si” tiin an langhter, tutiang ah minung 68 cu an thi cang tiah fehter a si.
Hi ngaihchiatnak faak tuk thil a cangmi ah hin vanlawng aa cit ve mi passenger pakhat nih cun vanlawng accident a ton lai teah video a rak zeih, cu video cu tuhi Social Media zongah a hung karh ngaingai, a video thlakmi zoh tik ah ngaih a chia hringhran, minung hi hmailei kong kan chimcia khawh lo zia le kan nunnak hi kanmah kut ah a um lo zia hi a fiang tak tak ko. A tanglei ah hin VIDEO zong zohkhawh a si.
Video Credit: Youtube
