Related Articles
Nihin Victoria Camp an kahnak ah CNA ralkap minung pa nga an nunnak a liam tiah theih a si i minung pa hra hrawng hliam an tuar tiah an chim. Nihin January 10 zaanlei suimilam 4 le ti hrawngah CNF/A Headquarter Victoria Camp cu ralhraang nih vanlawng in an kah tiah theih a si.
Nihin Camp kahnak ah nunnak a liam mi hi CNA pa minung pathum le nu pahnih an si tiah theih a si. Nunnak a liam mi ah theihfian cangmi, fehter cangmi hi Zahnaktlang lei in Bawino Duh Tin (Ruabuk) le Sui Len Par (Fungkah) an si tiah fehternak an tuah cang. A dang hna cu thawngfiang a um rih lo tiah an chim.
The Chin Journal hna nih cun hitihin a langhter ve “Nihin zaanlei ah SAC ralhrang nih CNA/F Headquars cu vanlawng 5 in an kah i CNA ralkap pa 3 le nu 2 an nunnak a liam, tiah thanwgpang kan theih. A dang aa hliammi minung 10 hrawng zong an um. Vanlawng hi India ramchung lei in a rung lut a titu zong an um nain fiang ngai in theih a si rih lo” tiin an langhter ning cu a si.
Tukum Chungah MAH Chunmang A Tling Kho Lai Maw? Feb 1, 2021 ah MAH nih hramhram in nawlngeihnak a lak i Feb 1, 2023 ah kum 2 a tling cang lai. SAC nih cun nawlngeihnak kan lak (အာဏာသိမ်း) an ti duh lo i 2008 phunghrampi poh-mah 417 ningin nawlngeihnak kan tlaih chung (အာဏာထိန်း) tiah an thanh.
President U Win Myint an tlaih lecangka in Vice President-1 Myint Swe cu caankarlak President a si colh ve. U Myint Swe nih cun National Defense and Security Council-NDSC (အမျိုးသားကာကွယ်ရေးနဲ့ လုံခြုံရေးကောင်စီ) meṭing a auh i phunghrampi poh-mah 417 ningin kum khat chung rampi dirhmun ṭihnung (State Emergency) a thanh. State Emergency cu phunghrampi poh-mah 425 ningin thla 6 in voihnih peh/sauh khawh a si. NDSC meṭing ah caankarlak President U Myint Swe nih poh-mah 418 (a) ningin ralbawizik MAH cu rampi nawlngeihnak a pek. State Emergency cu a saubik kum hnih lawng a si caah hmai thla Februay 1 ah MAH nih rampi nawlngeihnak cu NDSC ah a pek ṭhan lai. Cuticun poh-mah 429 ningin NDSC nih thla ruk chungah thimnak tuah ding a si.
2008 phunghrampi ningin NDSC cu rampi President nih a hruaimi a si i chungtel dang hna cu Vice President pahnih, Amyotha Hlutdaw chairman, Pyithu Hlutdaw chairman, ralbawizik (commander-in-chief), ralbawizik changtu (deputy commander-in-chief), runvennak vuanci, ramleng vuanci, ramri vuanci le ramchung vuanci hna an si. Atulio i NDSC hruaitu cu President Myint Swe a si tinak a si cu! Vice President-2 Pu Henry Van Ṭhio cu NDSC ah an telh rih lai nain meṭing kainak nawl a ngei lai lo tiah theih a si. Phunghrampi poh-mah 427 (b) ningin NDSC nih ralbawizik sinah Innhngak cozah sernak nawl a pek khawh. Atulio Preisident Myint Swe cu MAH duhning lawngin a nungmi a si caah NDSC nih MAH cu Innhngak cozah ṭuanvo an pek taktak khawh men ti hi an zumh ngai.
Cheukhat nih cun MAH nih NDSC sinah nawlngeihnak pek ṭhan lo, thimnak zong tuah loin pehtlai in nawlngeihnak a tlaih rih men lai tiah an zumh. Thimnak tuah ṭung i anmah nih tei sual ding kha an phang. Feb 1, 2021 i nawlngeihnak an lakmi kha anmah nih cun 2008 phunghrampi ningin “nawlngeihnak kan tlaih chung (အာဏာထိန်းတယ်)” an ti. Nawlngeihnak tlaih chung cu 2008 phunghrampi nih a onh nain nawlngeihnak lak (အာဏာသိမ်း) cu a onh lo. Cucaah thimnak tuah lo, asiloah a tuah ko nain a tlamtlin lo i MAH nih nawlngeihnak a lak rih ahcun 2008 phunghrampi a buar caah a hrawh lawlaw a hau hnga.
Asinain 2008 phunghrampi cu MAH le SAC ralbawi hna an saduhthah tlintertu a si. Khongton uktu hna kuttlaih cauk, Adolf Hitler ṭialmi “Mein Kampf” le Niccolo Machiavelli ṭialmi “The Prince” bantukin 2008 phunghrampi hi MAH le SAC ralbawi hna caah a sunglawi, an kuttlaih cauk a si ve. Cucaah a si khawh chungin thimnak an tuah lai. An duhning bantukin an tuah khawh lo zongah lih le hrokhrawl in an nawnnok lai i vawleipi theih in thimnak kan tuah i teinak kan hmuh, mipi nih an kan thim tiah an thanh lai. China, Russia, India le Thailand nih mipi thimnak in a kai mi cozah cu kan cohlan ko an ti lai i cuticun MAH nih kan ram cu 2008 phunghrampi hmangin a uk lai. Amah a thih hnu zongah amah bantukin misual le mihrokhrawl nih an kan uk lai.
Cucaah MAH chunmang hi a tlin lo nakdingah dohthlennak tuahtu hna nih ramhcung ramleng he biatak tein ṭan le cawlcangh a hau. Tutan ah kan tlolh ahcun kan ram ah zaukphung (federal democracy) cu zeitik hmanh ah kan hmu kho ti lai lo. Salai CP Lian. Credit: The Chin Post
