Related Articles
Oman ram i khua a sami Chin nungak pakhat nih “Ka inn ngeitu pa nih hin tuaitam (tlaihhrem) a ka timh lengmang. Ka agent pakhat ka chimh len zong ah inn dang kawlpiak a ka tim hlei lo. Yangon i a um mi agent zong ka chawnh len ko nain, zei san a tlai lo. Agent van chim ning ka ti ah le ka caah ttihnung lai ti ka phaang fawn. Tlun a duhmi kan tampi nain kan tlung kho fawn lo, an kan bawm kho mi an um hnga maw?” tiin Vapual Auaw Chat Box ah voice le cakuat kan dong tiah Vapual Auaw nih cun a langhter.
Hiti hin Vapual Auaw nih cun lehnak kan tuahning a si “Na agent sin ah na him lonak kong cu rak chim lengmang koh. Na inn ngeitu nih tuaitam an timh a si ahcun faak piin rak au koh. Tlun konghe pehtlai cun nan mah lei contract nan ngeihmi kha fian a hau. Oman, Dubai le Iraq lei hi kum 2 tal cu um ta a hau, cu hlan paoh cu tlun duh a si zongah puaisa nih an phutmi phaisa pek an hau i tlun man mah tein i rin a herh in kan thei. Pacan rak i cuh law a tuarziatu rak thiam ko kun” tiin lehnak cu kan tuah.
Vapual Auaw nih a langhter tthan ning ahcun hi kan farnu thil tonmi konghe pehtlai in a tu cu Oman i khua a sa vemi kan far nu pakhat nih ka rak buaipi lai tiah a ti i tuhi chawnhbiaknak zong an ngei cang tiah a langhter. Vapual Auaw hi Chin miphun lak ah ngeihmi media ngan pakhat a si ve i Falam lei tawlrelmi Media a si. A tubantuk ah an thil tuahmi hmuh tikah thangtthat an phu hringhran.
Oman ram hi Muslim ram pakhat a si, an phaisa thlen hi a ttha taktak. Kanmah Chin miphun kan farle tampi zong rian ttuan ding in aa hlawhfami le khua a sami tampi an um. Muslim ram a si tik ah kan nih Khrihfa caah cun thin a phaang ziar tawn cu caah kan farle rianttuanmi hna zong nih biatak tein i ralrin zia kan thiam a herh. Ram buai he a si tik ah Chin miphun hi zaangfak ngai cu kan si, Pathian tu nih a rauh hlan ah teinak kan pe sehlaw mah le ram, khua le inn cio ah duhdim tein umkhawh caan tu um hram seh.
