Related Articles
MAH cozah thawl khawhnak ding lam pahnih: meithal (vs) thimnak mee: Cozah pakhat duh lo ahcun thlen khawhnak lam pahnih a um — hriamnam thazaang le thimnak vote an si. Suu Kyi nih Thein Sein cozah kha thimnak vote in a thawl khawh, MAH nih Suu Kyi cozah kha hriamnam in a thawl ve.
Atu MAH cozah zong hi thawl khawhnak ding lam pahnih bak a um ve. Hriamnam in thawlnak ding lam cu kum 2 kan kal cang, kanmah nakin an hriamnam thazaang a let thonghra in an thawng deuh rih. Tei ding cun nunnak a ting in a liam chap te lai. Tei khawh sual ahcun luatnak tling 100% taktak ngah a si ve lai. Thimnak vote in ral doh cu nunnak pek a hau lo, inn lo kangh le tah aihram mitthli tlak a um lo, kan ngeihmi mee kha meithal kuan ah hmang in kan huatmi cozah kha tengh lak kah bantuk khi a si.
Mah thimnak lampi kan zulh khawh ahcun tuhnu kum khat hnih ah Thein Sein cozah chan bantuk 30% democracy kha kan phan than te lai, kum tampi chung ah tlawmpal tete in kan ram ai thleng te lai, luatnak 100% tling ngah ding cu ruahchan nak a um lo, ralkap nih an cohlang khawhmi a zatawk luatnak ‘60% democracy’ lawng ngah khawh a si te lai. Nain, hi thimnak mee meithal kuanpi hi cu tulio Chinmi 70% nih ralkap huat ruang ah hman kan i tim rih lo timi a fiang.
Ralkap sermi thimnak phung cu a fair hoi lo, anmah lei minung 22 le kanmah lei 11 in bawlung chuih he ai lo. Tei an fawi lo, a fawi lo buin Suu Kyi nih 1990, 2015 le 2020 he a tei ko hna. Atu hi PR system a si chap i tei a har chinchin, nain PR hi tlangmi party ca cun a tha deuh. Nikum ah kan tei cang ko mi uknak an kan chuh i atu a thar in kan tuah than lai ti cu huat an tlai bak, khuaruah ah lungfah celh awk khi a si lo. Meithal he an si caah ‘cepa duh lo zong ah cepa’ dirhmun kan um hoi.
Atu dirhmun in cun rampi ‘union cozah’ cu tuhnu kum 10 chung USDP nih an tlaih te ko lai, NLD cu an nuar rih lai. Chinram belte ah cun ramtang unau hna nih an huat lomi miphun party an luh ve ahcun fawi tein USDP an tei lai i Chin cozah an ser kho ve te lai. Nain, zapi nih upat tihzahmi cu tutan thimnak an lut ngam lai ka zum tuk rih lo, huaha lo deuh miphun party pawl lawng khi an tih buin an lut te lai i mee an ngah kho tuk lai lo, USDP hi Chinram zong ah mee tam bik an ngah te ko lai. Credit: Salai Lung Thli Tum
