Related Articles
Ngaihchiatnak Thawngpang: Kan mitthli hmanh a hul hlan hlan ah thawngchia theih a si hoi tthan. Nihin January 15, kahdohnak hmun pakhat ah kan ralkap in CNA Bawino pakhat nih ram le miphun caah a nunnak a pek tiah thawng theih a si.
Hi hmun pakhat kahdohnak i a nunnak a liam mi CNA ralkap hi Biak Chum Nawl a si tiah theih a si. Bawino dirhmun tiang zong a phan cang, a kum zong hi mino kum 24 tluk hrawng a si i nihin January 15 i hmun pakhat kahdohnak ah tubantuk in a nunnak a pek cu ngaih a chia hringhran ko tiah media tthenkhat hna sin zong in thawng theih khawh a si.
Salai Biak Chum Nawl hi a nundam lio ahcun bochan taktakmi mino pakhat a si tiah an chim, zatlang rian siseh mino rian ah siseh pengtlang rian siseh Khrihfabu rian hrimhrim zong ah bochan taktakmi a si tiah theih a si. Hawi le kawm zong nih an bochanmi a si i micung zong ah a tangdormi mino pakhat a si tiah an chim. Fimcawnnak lei zong ah Yesin Cinthlaknak lei University ah Final Year a cawng lio mi a si i tubantuk in ram buai hram aa thok in CNA ralkap ah a luh hi a si tiah theih a si.
Nihin hmun pakhat kahdohnak ah hin SAC ralhraang lei zong a thi mi an tam i hliamhma pu mi zong an tam ngaingai tiah theih a si. Hi kahdohnak hmun le hma belte langhter a si lo. Tubantuk caan ah kan ralkap Bawino Biak Chum Nawl nih ram le miphun caah a nunnak a pekmi cu miphun pi zong nih upatnak sangbik kan pek i chungkhar hna ngaihchiatnak zong kan i hrawm ve.
