Related Articles
Hibantuk thawngpang theih cu lung a faak taktak ko, tutan kan dothlennak ahcun hibantuk thil tete hi a pakhatnak bik ah kan i ralrin a herh cem mi a si. Ahohmanh i zumh ding a si lo tihi kan thinlung ah kan chiah a herh ko. Tutan zong SAC ralhraang siinak in a zaam i PDF ah a lut tiah an timi pa nih hriamnam zeimawzat he SAC ralhraang sin ah a kir tthan tiah Chindwin News Agency nih a langhter.
Chindwin News Agency nih a langhter ning ahcun a cunglei hmanthlak kan rak langhtermi pa hi SAC ralhraang minung a si i cucu KPDF (Karenni People Defence Force) sin ah a zaam tiah rak theih a si a fawinak chim cun KPDF sin ah aa ap ti khawh a si. KPDF phu sin i a rak i ap lio tan zongah hin lunglawmhnak langhternak caah tiin phaisa zong ceilak an rak pek tiah theih a si. Atu ahcun meithal pathum le drone pakhat cu aa zaam pi tthan i KPDF sin in a chuak tiah theih a si, KPDF hmunkhuarnak hi Kayah State ah a si.
Mipi ralkap (PDF) i a rak luh lio tan ah hin Democracy ttanhtu minung tampi nih an rak thangtthat ngaingai, Civil Disobedience Movement (CDM) a tuah tiin bawmhnak phaisa zong tampi an rak hlut phah, Kawlram mipi nih an rak thangtthat. Cu vialte cu a taktak ahcun SAC ralhraang i an rak i timhmi si dawh si, Sungtthoh (Spy) phun ah maw an rak hmanmi a si hnga theih hlah, meithal pathum le drone pakhat cu aa zaampi diam tiah Chindwin News Agency nih cun a tarlangh ko.
Karenni People Defence Force sin in hriamnam zeimawzat aa zaam pi hnu ah SAC ralhraang sin ahcun a kir tthan tiah theih a si i SAC ralhraang caah cun rian pakhat aa lim (mission complete) tiah an ti. Hi thil hi kanmah Chin ralkap chung zongah a cangsual lai ti phan a um hringhran. Naite zongah ralhraang an tlaih hna tikah zalong tuk in kan chiah hna lo a biapi tuk hringhran.
