Related Articles
Gangaw Ah Chin Ramkulh Lei In Phurhmi Hriamthil SAC Nih A Tlaih: Magway ramṭhen, Gangaw No.1 Checkgate ah Chin ramkulh in Mandalay lei a kalmi khualtlawng leilawng 2 chung ah puahkehnak a chuahter khotu thilri (ဒီတိုနေတာ) thluan 5500 cu SAC ralkap nih February ni 15 ah an tlaih tiah tualchung mi nih an chim.
SAC nih hriamthil a tlaihnak kong cu SAC ṭanhtu media hna nih an phozar hnu ah cu thawngpang cu a dik ko tiah Gangaw tualchung mi hna nih an chim. “Gangaw ah an tlaihmi thilri hi mine sernak ding caah hmanmi thilri a si” tiah dohthlennak a tuahtu phu chungtel pakhat nih a chim. SAC nih a tlaihmi thilri kong ah a ngeitu phu theih a si rih lo. February ni 15, zanlei suimilam 4:00PM hrawng ah Gangaw peng No.1 checkgate ah Hakha in Mandalay lei a kalmi khualtlawng leilawng hna chung in tutan hi puahkehnak a chuahter khotu thilri a voikhatnak kan tlaih a si tiah SAC ṭanhtu media Fifty Two nih a langhter.
Leilawng khaltu cu biahalnak an tuah hnu ah, an hnu in a zulmi khualtlawng leilawng pakhat nih thilri a phurhnak kong cu SAC nih an theih caah lampi ah bawh in, puahkehnak a chuahter khotu thilri (ဒီတိုနေတာ) thluan 5000 an tlaih ṭhan. Leilawng khaltu cu tlaih an tong i, cu ni zinglei ṭhiam ah PDF caah riahcaw nan phurh tiin a dang leilawng khaltu 2 an tlaih chap hna tiah tualchung mi nih an chim. A luancia kum 2 chung ah hriam phun tling 17,697, kutser bomb lung 27,213 telh in zenkuan phuntling 1,382,668 kan tlaih tiah SAC nih a thanh.
Mizoram Ah Chin Pa Pakhat Nih A Nupi Meithal In A Kah Caah A Nupi Nunnak Liam: India, Mizoram ramkulh, Champhai peng ah Pu Bawi Ro Piang nih a nupi ṭhing Pi Siang Ngun Par(kum 40) cu February ni 15, zanlei suimilam 6:45PM ah meithal in a kah hnu ah a zaamtak tiah theih a si. An chungkhar in Mizoram ramkulh, Champhai ah an khuasaknak a sau cang, a nupi meithal in a kaptu hi rithaisii phurh ruang ah thong a rak tla bal i, thonginn a chuahnak a sau rihblo tiah theih a si.
Pu Bawi Ro Piang cu a nupi ṭhing inn ah cun leilawng he a kal i, bia i alnak a chuah caah a nupi a paw ah meithal in a kah, cu hnu ah leilawng cu i khalh in a zaam. Pu Bawi Ro Piang hi Falam peng Waibula khuapawng Zalang khuami a si. Nu Siang Ngun Par nih cun fapa fathum a ngeih hna i cu chung ah a fapa hniang hi thluak lei ah hawilo lo a si tiah theih a si. Credit: The Chin Post
