Related Articles
A poi hringhran ko, Min Aung Hlaing nih State tthenkhat le region tthenkhat ah Martial Law a phuan. SAC ralhraang hna nih hin kumhnih chung uknak an laakmi ah nunnak tampi zong a liam, thisen tampi zong a chuak, fahnak tampi zong intuar a si, asinain a duhning bantuk le a ruahnak bantuk cu a si lo. Cu caah nihin ah Martial Law a phuan hi a si.
SAC ralhraang nih Martial Law a phuan hi State pathum le region pathum ah an si. Cu hna lakah Chin State zong aa tel ve, Martial Law hi townships 13 chungah a phuan, cu lakah Chin State, Kayah State, Karen State, Bago region, Magway region le Sagaing region hna ah an si. Hi ti SAC ralhraang nih Martial Law a phuan tikah a hlannak kahdohnak le thahnawnnak zong a tam deuh lai tiah zumh a si tiah Chindwin News Agency nih cun a langhter. Hi Chin State chungah aa telmi hna cu Hakha, Thantlang, Matupi, Kanpalet, Tedim, Tongzaang le Falam hna an si.
Kum 2021 February thla ah khan nawlngeihnak cu phungning loin an laak tthan kha a si. Townships 37 chung i Martial Law a phuannak hmun ahhin kahdohnak le thahnawnnak a faak chinchin cang lai tiah zumh a si. Hi townships 37 chungah hin Chin State in townships 7 ah Martial Law a phuan. Sagaing region chungah hin 11 townships ah Martial Law a phuan, Bago region chungah townships 5, Taningtharyi region ah 2, Mon State ah 1, Karen State ah 2 le Kayah State ah 4 tiin Martial Law cu nihin ah a phuan cang tiah Chindwin nih a langhter.
Thawngdang Relchih: Tigyaing Ah SAC Gate KIA Le PDF Nih An Doh, SAC Ralkap 20 An Thi, 3 Hriamthil He Tlaih An Tong: Sagaing ramṭhen, Tigyaing Myataung lam tonnak ah a ummi SAC checkgate cu KIA le PDF phufonh nih nihin February ni 2 ah an kahdoh hna caah SAC ralkap 20 an thi, minung 3 an hriamthil he tlaih an tong tiah theih a si.
February 2, zinglei suimilam 5:00AM ah Tigyaing peng Myataung lam tonnak checkgate ah ummi SAC ralkap cu KIA, tualchung hriamtlai pahkahphah le PDF phufonh nih kalhnawh in an kahdoh hna caah SAC ralkap 20 hrawng an thi. SAC ralkap 2 le khuabawi pakhat tiin minung 3 cu meithal saumi, kuanfang le cazin catlap pawl he tlaih an tong tiah theih a si.
Tigyaing peng Myataung gate ah a ummi SAC ralkap kahdoh an ton caah bawmtu ding ah thlahmi SAC ralkap motor 2 cu PDF nih bomb puahhnawh in an kham hna tiah Takaung tualchung hriamtlai phu in chim phuannak nawlngeitu nih a chim.
