Related Articles
SAC Vanlawng nih Thantlang CNA/CDF Pawl Voi 40 Hrawng a Kah Hna: Nihin February 16, ni khat chung lawnglawng ah hin Thantlang khua ah a ummi CDF le CNA ralkap pawl cu SAC ralhrang nih Fighter Jet le Helicoter in voi 40 hrawng an kah hna, tiah thawngpang kan theih.
February 8 zaan ah CDF le CNA nih Thantlang khuachung i SAC ralhrang palik sakhaan le penguk zung an lak hnu in SAC ralhrang nih vanlawng kahdohnak fak chinchin in a tuah. Asinain, nihin ni tluk in hin ahlan ah ni khat chung te ah mah zahzah hi Chinram ah SAC ralhrang nih vanlawng kahnak a rak tuah ballo. Nihin ah SAC ralhrang Fighter Jet voi tam nawn an i let i, voi 20 Thantlang cu an kah. Jet in an kah lawng si loin Helicopter zong in voi 20 hrawng hi an kah chap.
Nihin SAC ralhrang nih Thantlang ah vanlawng in CNA le CDF ah kah hnanak ah aa hliammi le a thimi an um le um lo theih a si lo. Thantlang khua lak ṭhan ding in atulio hi Tilim Operation timi CNA le CDF nih an tuah cuahmah lio a si i, ramchung le ramleng a ummi Laimi hna zong nih chawva le thlacamnak in bawmh cio ding in sawmnak an tuah. Credit: TNA
Thawngdang Relchih: Vanral I Vennak Ding Caah Ngiathlaitu Kan Herh Tiah NUG Nih Sawmnak A Thanh: Hramhram in nawlngeihnak a latu SAC ralkap nih vanlawng hmang in cawlcanghnak le kahdohnak a tuahmi kong ah a hlankan in i runven khawhnak ding caah vanral hlathlaitu kan herh tiah NUG nih February ni 16 ah sawmnak a thanh. SAC ralkap nih van lei cawlcanghnak a tuahmi kong ah a caan hmaan tein thawngpang theih khawhnak ding caah vanlawng sakhan le helicopter umnak hna cu ngiatthlai in thawngpang pek ding le van lei cawlcanghnak an tuah caan paoh ah thawngpang petu kan herh tiah NUG nih cun a langhter.
SAC nih vanlawng hmang in kahdohnak a tuah tikah a hlankan in kan i runven khawhnak ding caah le mipi an himnak ding caah ngiatthlai piaktu nan um a si ahcun NUG runvennak vuanci Telegram Channel ah pehtlaih le thawngpang pek khawh kan si tiah an langhter. A luancia 2022, March thla in SAC nih dohthlennak ca cawlcanghnak a tuahtu phu hna doh ding in ramchung hmun kip ah vanlawng hmang in dohnak a tuah.
A luancia October thla chung ah NUG cozah nih a langhter ning ah SAC nih tlangcung mi hna umnak telh in ramchung mipi hna cu tinhchih in vanlawng hmang in bomb thlaknak voi 240 hrawng a tuah. SAC nih vanlawng hmang in dohnak a tuah ruang ah tualchung mi 200 leng an nunnak a liam, tualchung mipi umnak inn le biaknak lei inn hna zong tampi a rawk tiah theih a si.
