Related Articles
Thawngpang ttha taktak theih a si, suimilam pali (4) chung kahdohnak ah ralhraang minung 30 an thi tiah theih a si. Hi ralhraang minung 30 a thi mi lakah vanlawng lei ralbawi a simi pakhat zong aa tel chih tiah Vapualauaw nih a langhter.
Hi kahdohnak hi Bago PDF le ralhraang karlak a si i Bago ramtthen Yitasi myone ဇရစ်ရိုးကုန် khua pawngah a si, hi an i kahdohnak hi suimilam 4 chung a rau tiah theih a si i ralhraang lei minung 30 an nunnak a liam tiah Bago PDF nih cun cathanh an chuah. Hi ralhraang 30 a thi mi lakah hin vanlawng lei sakhaan ah ralbawi pakhat a simi Bohmukyi Zeya Tun zong aa tel ve tiah an chim.
Bago PDF nih cun “Zinglei suimilam 9 in chun suimilam 1 tiang, suimilam 4 chung ralhraang he cun kan i kaap hna. Hi kahdohnak ah ralhraang minung 30 an thi i hliamtuarmi tampi an um. Ralhraang pawl nih mipi thilri an rak firmi tete zong zeimawzat kan laak khawh. Ralhraang sin kan laakkhawhmi hi meithal 7, kuanbawm 18, kuan 520 le bomb 2 hna an si. Ralhraang nih mipi thilri an firmi lak ah kan laakkhawhmi hi sui tthi pakhat, sui kutdonghrolh pakhat le phone 3 hna an si.
“Ralhraang nih mipi sin in an firmi le an laakpiakmi hna pawl hi cu a ngeitu mipi sinah kan pek tthan dih hna lai. Atu February thla chungah hin ralhraang he kan i kahdohnak a linsa ngai. Kahdohnak ah ralhraang lei a thi mi an tam tikah an duh paoh in hriamngan an kah tikah mipi lakin pahnih an nunnak a liam cang i pahnih nih hliamhma an tuar. Mipi inn zong an khangh hna. Hi kahdohnak ah hin kannih mipi ralkap lei cu kan him, Kahdohnak ruangah mipi ralzaam an tam chin lengmang i cucu kan nih zong nih NUG sinah bawmh hal in kan chawnh cuahmah lio hna a si” tiah cathanh an chuahning a si.
