Related Articles
Benjamin Sum cu Guys From Chin nih meeting tuah dingmi ah suimilam pakhat a tlai caah Rs 1000 an liamter pin ah a cal voihnih an peh. Hi ti kan van ttial tikah a lau hna nan lau tuk sual lai ti cu phan a um, capo phun in Benben hi an timi zong a si kho. A tangcem ah a cal an peh lio VIDEO um lai.
Guys From Chin cu Chin miphun nih a thei/hngal lo kan um lai lo dah. Tu lio ahcun Chin miphun huap in hlasami ah a laarbik pawl an si lai. Min Aung Hlaing nih phung ning loin uknak a laak tikah India, Mizoram ah a tam u cu kan zaam hna. Guys From Chin zong hi a hlan ahcun pumpak cio in hla a sami an si hna, Mizoram ah an i tong cio hna i a tubantuk in Guys From Chin an dirh hi a si. Guys From Chin ahhin Thawng Bawi, David Lai le Benjamin Sum hna hi an si.
Nizaan tihni te zongah Chintube nih a tuahmi Music Video “We Are The World” timi hla cover nakah hlasa in an i tel ve, hmunkip kaakip um ralzaam camp ah kal in kan unau hna ralzaam sin ah hlasaknak tete zong an van ngeihpiak tawn hna, kan Miphun caah anmah sikhawh tawk le sining tawk in aa zuam taktakmi phu an si. Aizawl tibantuk zongah Charity Concert hna an ngei i an hmuhmi phaisa cu ralzaam bawmhnak ah an hman tawn. An thil tuahmi tete zoh tikah thangtthat an phu ngaingai, Mizo hlasa tampi he zong hawi ah an ser hna i cucu a tutan kan dothlennak zongah a biapi taktakmi pakhat a si.
Cun hi pathum hna hmunkhat teah phu an van dirhmi nih Chin miphun tampi caah lungrualnak tete zong a chuahpi ttheu lai tiah zumhnak a um i cucu Thawng Bawi hi Hakha a si, David Lai hi Mara a si i Benjamin Sum hi Falam a si. Hibantuk lungput an ngeihmi hrimhrim nih hin miphun ah pakhat kan sinak le tutan kan dothlennak ah nang/kei timi lungput kan ngeih lo dingmi a thar in an chuah tthan tikhawh a si. Tutan kan dothlennak ah hmunkhat te i lungrual tein kan ttan lo a si ahcun teinak cu a har ko lai cu caah Guys From Chin lungput hi i cawn cio ko hna usih.
A cunglei konghe pehtlai in Benjamin Sum cu meeting a tlai caah Rs 1000 liamter le cal peh ai huah, hi hi anmah Guys From Chin Official Facebook page ah Video he an rak taar chih. Capo phun in an tuahmi a si i Benjamin hi an lak i ngakchia bik zong a si caah dawtnak he an timi zong a si. A tanglei ah kan in dawt tuk kan nauhniang Ben tiah an ttialchap. Hitihin an langhter ning cu a si “He was late group meeting for 1 hour, so we charged him Rs.1000 plus ခေါင်းခေါက်, Love you little Bro Ben” tiin an langhter ning cu a si. A tanglei ah hin a cal an kingh lio VIDEO zohkhawh chih a si lai.
Credit: Guys From Chin (Facebook)
