Related Articles
Kawthoung Pengkomh Kahdohnak Ah Tualchung Hriamtlai Phu Minung 9 Nunnak Liam: Taningtharyi ramṭhen, Kawthoung pengkomh Hkamaukkyi(ခမောက်ကြီး) peng Waidin khua ah tualchung hriamtlai phu chungtel minung 9 an nunnak a liam tiah theih a si.
March ni 4, zinglei suimilam 8:00AM hrawng ah Waidin khua cu SAC ralkap nih hriamngan an kah hnu ah SAC ralkap le tualchung hriamtlai phu kar minutes 20 tluk kahdohnak a chuak tiah theih a si. SAC ralkap hna nih hriamngan voi tam tuk an thlah hnu ah khuachung ah cun an luhhnawh hna, cu hnu ah kaphnih kar kahdohnak a chuah hi a si tiah tualchung mi nih an chim. Tualchung hriamtlai phu minung 15 chung ah 9 an nunnak a liam i, a dang 6 hi an zaam kho tiah kan theih tiin an chim chap.
Cu thilcangmi kong he pehtlai in Kawthoung pengkomh tualchung hriamtlai phu lei nih cathanh a chuahmi a um rih lo.
SAC lei ṭangmi sosial media hna nih cun kaphnih i kahnak ah tualchung hriamtlai phu minung 9 an thih pin ah meithal 5, kuanfang zun 200, kut ser bomb lung 38 le seh he aa pehtlaimi thilri kan laak tiah an ṭial.
Tanghra Camipuai Tuah Chung Ah Matupi Peng Lam Dihlak Kan Phih Lai: SAC ralkap kuttang um cacawnnak tanghra camipuai cu a ralaimi March ni 8, cawnnithum in thawk a si cang lai, camipuai tuah ni thawk in Matupi peng lam dihlak kan phih lai tiah SAC nih an thanh tiin tualchung mi nih an chim.
Matupi khua cu atu lioah eiding ngei loin a ummi khua pakhat a si i, Kawl lei in facang a luh lo leng ah Matupi peng khuate ah khuabawi an um ti lo caah khuami hna zong khuapi lei ah an kai kho lo, cucaah khuate lei in facang a lut kho lo tiah theih a si. Tualchung mi hna nih an chimning ah cun SAC ralkap nih phone line hi kan onpiak cang hna seh law eidin kan donghcahmi harnak zong hi kan tawlrelpiak hna seh law a ṭha hnga tiin an chim.
Matupi khuachung ah eiding a har tuk ruang ah khuapi chung um tam deuh cu Yangon lei ah an kal i khuachung um kum upa deuh le tar deuh zong an umnak hmun kaltak in hmun dang ah an i dor hna tiah theih a si. Credit: The Chin Post
